काठमाडौँ । कांग्रेस र एमालेबीच सत्ता समीकरणमा सहमति जुटे लगत्तै प्रधानमन्त्री पुष्पकमल दाहाल कांग्रेस मुख्यालय सानेपा पुग्नुभएको छ । 

पूर्व प्रधानमन्त्री गिरिजाप्रसाद कोइरालाको जन्म शताब्दीको अवसरमा कांग्रेस केन्द्रीय कार्यालयमा भएको फोटो प्रदर्शनीको अवलोकनको लागि प्रचण्ड सानेपा पुग्नुभएको हो । 

प्रदर्शनी अवलोकन गरेपछि प्रचण्डले कुनै राजनीतिक वक्तव्य दिनुभएन । बरु शान्ति प्रक्रियामा गिरिजाप्रसाद कोइरालाको अतुलनीय भूमिका रहेको भन्दै कोइरालाको प्रशंसा गर्नुभयो । 

उहाँले गिरिजाप्रसाद कोइरालासँग ५६ ५७ सालमा पहिलो पटक कुराकानी भएको प्रसंग सुनाउनुभयो । शान्ति प्रक्रियामा नजिकबाट काम गरेको पनि बताउनुभयो । गिरिजाबाबु नभएको भए को कहाँ पुग्ने, टुंगो नभएको भन्दै उहाँले गिरिजाबाबुको प्रशंसा गर्नुभयो ।’ 


गएराति मात्रै प्रचण्डलाई विस्थापित गरेर एमाले अध्यक्ष केपी शर्मा ओलीको नेतृत्वमा कांग्रेससहितको सरकार बनाउने सहमति भएको छ । प्रचण्ड फर्किएपछि एमाले अध्यक्ष ओली फोटो प्रदर्शनी अवलोकन गर्न पुग्नुभएको थियो ।