काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकार आजदेखि ढल्दैछ । 

प्रतिनिधिसभका ठूला दल नेपाली कांग्रेस र नेकपा एमालेबीच नयाँ सरकार बनाउने सहमति भएको छ । ठूला २ दलबीच सोमबार मध्यरातमा सत्ता सहकार्य गर्ने सहमति भएसँगै  प्रचण्डको प्रधानमन्त्री पद गुम्ने अवस्था बनेको हो । 

कांग्रेस र एमालेका दोस्रो तहका नेताहरुले  सोमबार राति ललितपुरको एक होटलमा सत्ता सहकार्यको सहमति ड्राफ्ट  गरेका छन् । सहमति ड्राफ्टमा आज कांग्रेस सभापति शेरबहादुर देउवा र एमालेका  अध्यक्ष केपी शर्मा ओलीबीच हस्ताक्षर हुनेछ ।

बैठकमा सहभागी नेताका अनुसार  प्रतिनिधिसभकाको बाँकी कार्यकालसम्म कांग्रेस र एमालेबीच प्रधानमन्त्री आलोपालो गर्ने सहमति  भएको छ । दुई दलबीच पहिलो २ वर्ष  एमाले अध्यक्ष ओली प्रधानमन्त्री बन्ने सहमति भएको छ । त्यसपछि निर्वाचनसम्म कांग्रेस सभापति देउवा प्रधानमन्त्री बन्नु हुनेछ । 

दुई दलले मन्त्रालयको भागबण्डा समेत गरिसकेका  छन् ।  एमालेले अर्थसहित ९ वटा मन्त्रालय र कांग्रेसले गृहसहित १० वटा मन्त्रालय लिने सहमति भएको छ । दुई दलबीच संविधान संशोधनका लागि सुझाव दिन एक समिति बनाउने सहमति  समेत भएको बैठकमा सहभागी एक नेतले जानकारी दिनुभएको छ ।