काठमाडौँ । सत्ता गठबन्धनको निर्णयक दल नेकपा एमाले नेतृत्वले प्रमुख प्रतिपक्ष दल नेपाली कांग्रेसका सभापतिसँग हिमचिम बढाउन थालेपछि प्रधानमन्त्री पुष्पकमल दाहाल ‘प्रचण्ड’ झस्किन थाल्नुभएको छ ।

एमाले अध्यक्ष ओलीले कांग्रेस सभापति देउवासँग शनिबार भेटवार्ता गर्नुभएको थियो । ओली निवास बालकोटमा भएको भेटवार्ताको सहमति, निर्णय तथा योजना दुवै पक्षले अहिलेसम्म गोप्य राखेका छन् । यद्यपि ओली र देउवाबीच मुलुकको अवस्था, राजनीति र सरकारको कार्यशैलीबारे गहन छलफल भएको अनुमान गरिएको छ । ओली र देउवाबीच धैरै समयपछि आकस्मिक रुपमा भएको भेटवार्ताले कतिपयले सत्ता समीकरण फेरबदल हुनसक्ने आंकलन समेत गरेका छन् । 

एमाले अध्यक्ष ओलीले कांग्रेस सभापतिसँग गरेको भेटवार्तापछि प्रधानमन्त्री दाहाल सशंकित बन्नुभएको छ । एमाले अध्यक्षको  देउवासँगको भेटवार्ता पछि प्रधानमन्त्री दाहालले ओलीसँग छलफल थाल्नुभएको छ । देउवासँगको भेटवार्ता लगत्तै प्रधानमन्त्री दाहालले आइतबार एमाले अध्यक्ष ओलीसँग छलफल गर्नुभएको थियो । 

आज बिहान बालुवाटारमा भएको छलफलमा उहाँहरुबीच सरकार सञ्चालनलाई थप प्रभावकारी बनाउने  विषयका अतिरिक्त मुलुकको  समसामयिक राजनीतिक अवस्थाबारे छलफल भएको प्रधानमन्त्रीका सञ्चारविज्ञ मनोहरि तिमिल्सिनाले  जानकारी दिनुभएको छ।