काठमाडौँ । जननेता मदन भण्डारीको आज ७३ औँ जन्मजयन्तीमा उहाँले मुलुक र राजनीतिमा पुर्याउनुभएको योगदानसहित सम्झना गरिँदैछ ।  

नेपाल कम्युनिष्ट पार्टी एमालेका तत्कालीन महासचिव भण्डारीको जन्मजयन्तीमा विविध कार्यक्रम समेत गरिँदैछ । स्वर्गीय जननेता भण्डारीको योगदान स्मरण गर्दै एमालेले देशैभर विभिन्न कार्यक्रम आयोजना गरेको छ ।  

मदन भण्डारी फाउण्डेसनको आयोजनामा आज एमाले मुख्यालय  च्यासलमा मदन भण्डारी राष्ट्रिय पुरस्कार वितरण तथा जबजः राजनीतिक विकास र स्थायित्व विषयक विचार गोष्ठीको आयोजना गरिएको छ ।

जन्मजयन्तीका अवसरमा यसअघि अनेरास्ववियुले असार १२ गते वृक्षरोपण गरिएको थियो । मदन भण्डारीले २०४९ माघ १४–२० मा सम्पन्न एमालेको पाँचौँ राष्ट्रिय महाधिवेशनमा प्रस्तुत गरेर पारित गरिएको ‘जनताको बहुदलीय जनवाद’ अहिले पनि एमालेको मार्गदर्शक सिद्धान्तका रूपमा रहेको छ ।

विसं २००९ असार १४ गते ताप्लेजुङको ढुङ्गेसाँघुमा आमा चन्द्रकला र बुबा देवीप्रसाद भण्डारीको माइला छोराका रूपमा उहाँको जन्म भएको थियोे । विसंं २०५० जेठ ३ गते पार्टीको कामको सिलसिलामा पोखराबाट चितवन जानेक्रममा दासढुङ्गामा दुर्घटना हुँदा उहाँसहित पार्टीका सङ्गठन विभाग प्रमुख जीवराज अश्रितको निधन भएको हो। 

जननेता भण्डारी नेपालको राजनीतिक वृत्तमा माक्र्सवादको नवीन प्रयोगकर्ता, विचारक तथा जनताको बहुदलीय जनवाद सिद्धान्तका प्रवर्तक मानिनुहुन्छ ।