विराटनगर । बाढी पसेपछि बन्द भएको विराटनगर विमानस्थल आज दिउँसो ४ बजेपछि खुलेको छ। वर्षा रोकिएको र बाढीको पानी सुकेको साथै बाढीको जोखिम पनि नदेखिएकाले  विमानस्थलको उडान अवतरण सुरु गरिएको विराटनगर विमानस्थलका सूचना अधिकारी युवाराज भण्डारीले जानकारी दिनुभयो । 

बस्तीबाट ओभरफ्लो भएर विराटनगर विमानस्थलको १ नं गेटबाट  बाढी पसेपछि बुधबार बिहानैदेखि विमानस्थल बन्द गरिएको थियो। उहाँका अनुसार बस्तीबाट ओभरफ्लो भएर पसेको बाढीले विमानस्थल जाने बाटो अवरुद्ध बनेको थियो। विमानस्थलको  पार्किङ क्षेत्रमा र  हेलिप्याडमा समेत बाढीको पानी पसेर डुबानमा परेको थियो।

तर, विमानस्थलको धावनमार्गमा बाढी नपसेका कारण वर्षा र बाढीको प्रभाव कम भएसँगै विमानस्थलबाट उडान र अवतरण सुरू गरिएको हो। विराटनगर विमानस्थलबाट दैनिक औषतमा १८ वटा फ्लाइट हुने गरेको छ।