कैलाली ।  कैलाली र लमजुङमा चट्याङ लागेर ३ जनाको मृत्यु भएको छ । चट्याङबाट ७ जना घाइते भएका छन् । 

कैलालीमा चट्याङबाट २ जनाको मृत्यु भएको छ । जोशीपुर गाउँपालिका–३ भितरियाका ३१ वर्षीय जयराम डगौरा र धनगढी उपमहानगरपालिका– १८ एफ गाउँका २७ वर्षीय शालिम चौधरीको चट्याङबाट मृत्यु भएको  हो । 

प्रहरी नायव उपरीक्षक कविन्दसिंह बोहराका अनुसार डगौरालाई खेतमा आली  लगाउने क्रममा चट्याङ लागेको थियो । महापार्वती क्लिनिकमा उपचारको क्रममा मृत्यु भएको हो  । चौधरीको खेतमा रोपाइँ गर्ने क्रममा चट्याङ लागेको थियो ।   सेती प्रादेशिक अस्पताल धनगढीमा उपचारकै क्रममा मृत्यु भएको हो ।

चट्याङ लगेर जानकी गाउँपालिका–४ बेलपुरका २९ वर्षकी रीता कठरिया,  त्यही ठाउँकी वर्ष २३ की सुष्मा डगौरा, भजनी नगरपालिका–६ वर्ष ५५ को रामबहादुर चौधरी, घोडाघोडी नगरपालिका–९ बुदेनी वर्ष ९ की सरस्वती भुल र सोही ठाउँका वर्ष ७ की पारु कठायत र वर्ष १० की खिमा कठायत घाइते हुनुभएको छ ।

यसैबीच, लमजुङको क्व्होलासोथार गाउँपालिका–७ तल्लो केम्लीगाउँमा चट्याङ लागेर १ जनाको मृत्यु भएको छ । ६५ वर्षीय दानबहादुर घर्तीलाई  चट्याङ लागेको हो । 

दानबहादुर मंगलबार राति शौचालय जान बाहिर निस्कने क्रममा चट्याङ लागेको जिल्ला प्रहरी कार्यालय लमजुङका प्रहरी निरीक्षक मेघनाथ चापागाईंले जानकारी दिनुभएको छ ।  

चट्याङका कारण राइनास नगरपालिका–९ ढाड कलाउँचेका ३८ वर्षीय रामचन्द्र अधिकारी घाइते हुनुभएको छ । प्रहरी निरीक्षक चापागाईंका अनुसार उहाँको सुन्दरबजारस्थित नमूना अस्पतालमा उपचार भइरहेको छ । 

चट्याङका कारण बेँशीशहर नगरपालिका–६ शेराका स्थानीय मदन परियारको एउटा गोरु पनि मरेको प्रहरीले जनाएको छ ।