काठमाडौँ । गण्डकी प्रदेशसभा सदस्य फणिन्द्र देवकोटाको पद जोगिएको छ । सर्वोच्च अदालतले फणिन्द्र देवकोटालाई गण्डकी प्रदेशसभा सदस्यका रुपमा काम गर्न दिन अन्तरिम आदेश दिएको छ । 

सर्वोच्चको आदेशपछि देवकोटाको सांसद पद सुरक्षित भएको हो । सोमबार न्यायाधीश प्रकाशमान सिंह राउतको एकल इजलासले देवकोटालाई नेकपा माओवादी केन्द्रले गरेको कारबाही कार्यान्वयन नगर्न र सांसदको रुपमा काम गर्न दिन अन्तरिम आदेश दिएको हो ।

यो आदेशसँगै देवकोटाले गण्डकी प्रदेशसभा सदस्यको हैसियतमा कामकाज गर्न पाउनुहुनेछ । ह्वीप उल्लंघन गरेर मुख्यमन्त्री सुरेन्द्रराज पाण्डेलाई विश्वासको मत दिएपछि  माओवादी केन्द्रले उहाँलाई कारबाही गरेको थियो । माओवादीले गरेको कारबाहीको सूचना सभामुख कृष्ण धितालले प्रदेशसभामा पढेर सुनाएपछि उहाँ पदमुक्त हुनु भएको थियो । 

देवकोटाले भने आफू नेपाल समाजवादी पार्टीको सदस्य भएकाले माओवादी केन्द्रले कारबाही गर्न नमिल्ने जिकिर गर्दै आउनु भएको छ । २०७९  मंसिर ४ गतेको प्रदेशसभा निर्वाचनमा उहाँ माओवादी केन्द्रको चुनाव चिह्न लिएर गोरखा २ (१)  बाट निर्वाचित हुनुभएको हो ।