काठमाडौँ ।  नेपाल सरकारका मुख्यसचिव नै भ्रष्टाचारमा मुछिएका छन् । 

मुख्यसचिव डा बैकुण्ठ अर्याललाई अन्तशुल्क स्टिकर खरिदमा अनियमितता गरेको आरोप लागेको हो । बहालवाला मुख्यसचिवमाथि भ्रष्टाचार मुद्दा लागेको नेपालको निजामती इतिहासमा यो पहिलो घटना हो ।

अन्तशुल्क स्टिकर  खरिदमा भ्रष्टाचार गरेको भन्दै मुख्यसचिव अर्यालसहित  १२ जनाविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ ।  अख्तियारले अर्यालसहित अर्थ मन्त्रालयका सहसचिव रितेश शाक्य लगायतविरुद्ध मुद्दा दायर गरेको हो । सञ्चार तथा सूचना प्रविधि मन्त्रालयका सचिव रहेका बेला सुरक्षण मुद्रण विकास समितिका तत्कालीन अध्यक्ष  (हाल मुख्यसचिव)  डा अर्यालसहित, आन्तरिक राजश्व विभागका तत्कालीन महानिर्देशक एवं हाल अर्थसचिव शाक्य, त्यही विभागका तत्कालीन उपमहानिर्देशक एवं हाल भन्सार विभागका उपमहानिर्देशक टङ्कप्रसाद पाण्डे,  सुरक्षण मुद्रण केन्द्रका तत्कालीन कार्यकारी निर्देशक विकल पौडेल रहेका छन् । पौडेलविरुद्ध यसअघि पनि अख्तियारले सुरक्षण मुद्रण प्रकरणमा भ्रष्टाचार मुद्दा दायर गरिसकेको छ ।

 प्रकरणमा मुख्यसचिव अर्यालसहित आन्तरिक राजस्व विभाग, सामान्य प्रशासन शाखा एवं खरिद इकाई तत्कालीन निर्देशक गणेश विक्रम शाही र तत्कालीन शाखा अधिकृत रविन्द्रप्रसाद पौडेल, राष्ट्रिय सूचना प्रविधि केन्द्रका तत्कालीन निर्देशक सफल श्रेष्ठ, सुरक्षण मुद्रण केन्द्रका तत्कालीन शाखा अधिकृत हरिवल्लभ घिमिरे, लेखा  अधिकृत विष्णुप्रसाद गौतम र त्यही केन्द्रका तत्कालीन खरिद विज्ञ शक्तिप्रसाद श्रेष्ठविरुद्ध मुद्दा दायर गरिएको हो ।

मुद्दा दर्ता हुनासाथ मुख्यसचिवअर्याल स्वतः निलम्बन भएका छन् । अख्तियारले उनीहरूमाथि ३८ करोड ६७ लाख १७ हजार ६ सय ४० रुपैयाँ बिगो माग दाबी गरेको अदालतका प्रवक्ता धनबहादुर कार्कीले जानकारी दिनुभएको छ ।