काठमाडौँ । मानव अधिकारकर्मी सुशील प्याकुरेलले राजदूत बन्न अस्वीकार गर्नुभएको छ । सरकारले प्याकुरेललाई दक्षिण कोरियाका लागि नेपाली राजदूतको लागि सिफारिस गरेको छ । तर अधिकारकर्मी प्याकुरेलले त्यसलाई अस्वीकार गर्नुभएको हो । 

मन्त्रिपरिषद्को शुक्रबारको बैठकले  विभिन्न ८ मुलुकको लागि राजदूत सिफारिस गरेको थियो । त्यसमा प्याकुरेललाई दक्षिण कोरियाका लागि प्रस्ताव गरिएको छ । तर प्याकुरेलले आफूलाई राजदूत अस्वीकार भएको सामाजिक संजालमार्फत सार्वजनिक गर्नुभएको छ । 

‘राजदूत जस्तो जिम्मेवारी प्रदान गर्नुअघि सम्बन्धित व्यक्तिको पृष्ठभूमि, कार्यक्षमता, रुचि, कूटनीतिको विषय र सम्बन्धित मुलुकको राजनीतिक, आर्थिक, सामाजिक स्थितिसम्बन्धी ज्ञानका विषयमा पूर्व परामर्श नगर्ने सरकारको प्रचलनबाट म आश्चर्यचकित छु’ उहाँले सामाजिक संजालमा लेख्नुभएको छ– राजदूत नियुक्तिसम्बन्धी विगतमा सरकारले तय गरेको मापदण्ड र संसदीय सुनुवाइको औचित्य र राजदूतको कार्यकालका विषयमा गम्भीर विमर्श आवश्यक छ। मेरो नामको सिफारिश फिर्ता लिनुहोस्।’