बाँके ।  बाँकेमा बुधबार राति आएको हुरीबतासले विद्युत्को पोलमा क्षति पुर्याउँदा केही स्थानीय तहमा विद्युत् आपूर्ति बन्द भएको छ ।

जिल्लाको डुडुवा, राप्तीसोनारी, नरैनापुर लगायतका स्थानमा विद्युत् आपूर्ति बन्द भएको नेपाल विद्युत् प्राधिकरण नेपालगञ्ज वितरण शाखाका प्रमुख जगन्नाथ लामिछानेले जानकारी दिनुभएको छ  । उहाँले राप्तीसोनारीको जङ्गलमा रुख ढलेको र त्यसलाई हटाउन केही समय लाग्ने भएकाले विद्युत् आपूर्ति सहज गराउन समय लाग्ने बताउनुभयो ।

प्रमुख लामिछानेका अनुसार कोहलपुरमा ९, डुडुवामा ९, खजुरामा ८ र राप्तीसोनारीमा ५  गरी ३१ विद्युतीय पोल ढलेको अवस्थामा छन् । अझै कहाँ–कहाँ कति ढलेका छन्, विस्तृत विवरण आएको छैन’ उहाँले भन्नुभयो ।कोहलपुरको पिप्रहवामा ढलेको रुख व्यवस्थापन गरेर नेपालगञ्ज बजारमा विद्युत् आपूर्ति गरिने जानकारी दिँदै काम भइरहेकाले धैर्य गर्न स्थानीयलाई आग्रह गर्नुभयो ।

पर्खाल भत्केर एकको मृत्यु
बाँकेको कोहलपुर–१४ स्थित हवल्दारपुरमा हुरीबतासका कारण पर्खाल भत्केर १ जनाको मृत्यु भएको छ । कोहलपुर–१४  वीरगञ्जका मीना खातुनको मृत्यु भएको बाँकेका प्रहरी नायव उपरीक्षक नारायण डाँगीले जानकारी दिनुभएको छ । 

खातुनले स्थानीय राम्रो इन्टरप्राइजेज लगायतमा काम गर्ने गरेको प्रहरीको भनाइ छ ।  हुरीबतासका कारण जिल्लाको डुडुवा गाउँपालिका वडा नम्बर १ खडैचामा आगलागी हुँदा ३४ खरले छाएका घर जलेका छन् । घरमा रहेका अन्नपात समेत जलेको प्रहरीले जनाएको छ ।