चितवन । दर्जनभन्दा बढी सहकारी ठगी गरेर फरार भएका गितेन्द्रबाबु(जीबी) राई मलेसियामा बसिरहेको खुलासा भएको छ ।  

उपप्रधानमन्त्री तथा गृहमन्त्री रवि लामिछानेले जीबी राई मलेसियामा भएको पत्ता लागेको बताउनुभएको छ । श्री एयरलाइन्सको परीक्षण उडानका लागि आज भरतपुर आउनुभएका गृहमन्त्री लामिछानेले  पत्रकारसँग संक्षिप्त कुराकानी गर्दै राई बसेको लोकेसन पत्ता लागेको र उनलाई नेपाल ल्याउनेबारे छलफल भइरह्ेको बताउनुभएको हो ।  

राईको मलेसियास्थित लोकेसन कन्फर्म गरिएको गृहमन्त्री लामिछानेको भनाई छ  । ‘उनी कहाँ छन् भन्ने कुरा जानकारी भइसक्यो’ उहाँले भन्नुभयो ‘मलेसियाको गृहमन्त्रीसँग पनि मेरो कुराकानी भएको छ ।’

राई ग्लालेक्सी टिभीको अध्यक्ष रहँदा लामिछाने प्रवन्ध निर्देशक भएर काम गर्नुभएको थियो ।  सहकारी ठगी प्रकरणमा राईसँगै लामिछानेको पनि संलग्नता रहेको हुन सक्ने आशंका गरिएको छ । 

फरक प्रसङ्गमा गृहन्त्री लामिछाने राष्ट्रिय स्वतन्त्र पार्टीका मन्त्रीहरूले राजीनामा पत्र बोकेर हिँडेको भन्ने अभिव्यक्तिका कारण सरकार वा गठबन्धनमा समस्या आएको भन्ने कुरामा कुनै सत्यता नभएको बताउनुभयो । उहाँले भन्नुभयो– ‘हामीले शुरुवातदेखि नै राम्रो काम गर्न सकिएन भने सत्तामा टाँसिएर बस्न हुँदैन भन्दै आएका छौँ ।’

गृहमन्त्री लामिछानेले आफ्ना पार्टीका मन्त्रीहरूलाई केही गर्न पाए हुन्थ्यो भन्ने हुटहुटी रहेको र राजीनामा पत्र त्यो हुटहुटीको प्रतिबिम्ब भएको उल्लेख गर्नुभयो । प्रहरी महानिरीक्षक फेर्ने कुरामा सत्यता नभएको उहाँको भनाइ छ ।