काठमाडौँ । सांसदहरुले  दूधको भुक्तानी गर्न माग गर्नुभएको छ ।

प्रतिनिधिसभाको आजको बैठकमा नेकपा एमालेका प्रमुख सचेतक महेशकुमार बर्तौला र नेपाली  कांग्रेसकी सांसद नागिना यादवले किसानलाई दूधको भुक्तानी तत्काल दिन माग गर्नुभएको हो ।

एमाले प्रमुख सचेतक  बर्तौलाले  किसानका  समस्या सरकारले तत्काल वार्तामार्फत सम्बोधन गर्नुपर्ने उहाँले उल्लेख गर्नुभयो । बैठकमा आकस्मिक समयमा बोल्दै सचेतक बर्तौलाले किसानले दूधको भुक्तानीको माग गर्दै आन्दोलन गरेको लामो समय भएकाले सरकारले तत्काल समस्या समाधान गर्नुपर्नेमा जोड दिनुभयो । धर्नामा बसेका ४५ किसानलाई पक्राउ गर्नु दुःखद भएको उहाँको भनाइ छ ।

‘किसानको माग न्यायोचित छ, ६ लाख किसानले करिब  ६ अर्ब भुक्तानी पाउन बाँकी छ’ प्रमुख सचेतक बर्तौलाले भन्नुभयो– ‘किसानले बैँकबाट ऋण लिएका छन्, तिर्ने अवस्था छैन ।’ उहाँले किसानको समस्याको विषयमा कृषि मन्त्रालय, अर्थ मन्त्रालय र प्रधानमन्त्रीको ध्यानाकर्षण गराउँदै दूधको भुक्तानीको बक्यौता अविलम्ब उपलब्ध गराउनुपर्नेमा जोड दिनुभयो । 

कांग्रेसकी सांसद नागिना यादवले किसानको जीविकोपार्जनको मुख्य आधार कृषि भएकाले किसानको जायज माग पूरा गर्न सरकारको ध्यानाकर्षण गराउनुभयो । ‘आन्दोलनरत किसानको माग तत्काल सम्बोधन गर्नुपर्छ’ उहाँले भन्नुभयो । 

नेकपा एमालेका सांसद मानवीर राईले लामो  समयदेखि लुक्लास्थित तेन्जीङ हिलारी विमानस्थल अवरुद्ध हुँदा पर्यटकले सास्ती खेप्नुपरेको उल्लेख गर्नुभयो ।  विमानस्थलसँगै सडकसमेत अवरुद्ध हुँदा बिरामीलाई समस्या भएकोप्रति सरकारको ध्यानाकर्षण गराउनुभयो ।