काठमाडौँ । संसद भवनभित्रै प्रहरी जवान गोली लागेको अवस्थामा मृत भेटिएका छन् । 

संसद भवनको सुरक्षार्थ खटिएका नेपाल प्रहरीका जवान दोलखाका अजित गोले  मृत अवस्थामा भेटिएका हुन् ।  प्रहरी जवान गोले गोली लागेको अवस्थामा शौचालयभित्र मृत फेला परेको नेपाल प्रहरीका प्रवक्ता दानबहादुर कार्कीले जानकारी दिनुभएको छ । 

‘शौचालयतिर गोली चलेको आवाज सुनेपछि गएर हेर्दा अन द स्पट डेथ भएको पाइयो,’ प्रवक्ता कार्कीले भन्नुभयो ‘उनका साथीहरुसँग घटना हुनुभन्दा अगाडिको अवस्थाबारे बुझ्ने काम भइरहेको छ ।’ गोलेको शवलाई सिभिल अस्पतालमा पठाइएको छ ।

संसद सचिवालयका प्रवक्ता एकराम गिरीले भने गोलेले गोली हानेर आत्महत्या गरेको बताउनु भएको छ । गोले दोलखाको मेलुङ गाउँपालिका ४ का बासिन्दा हुन् । गोले   नेपाल प्रहरीको केन्द्रीय विशेष कार्यदल कपनमा दरबन्दी भई संघीय संसद सुरक्षा बेस नयाँबानेश्वरमा कार्यरत थिए ।

काठमाडौँँ प्रहरीका एसपी नवराज अधिकारीका अनुसार आज बिहान उनको ड्युटी ६ बजेदेखि बिहान १० बजेसम्म थियो । उनले करिब ८ बजेतिर आफूले बोकेको इन्सास राइफलले निधारमा गोली हानेका हानेका हुन् ।