काठमाडौँ । ‘सरकारको कार्यशैली बदल्ने र आफू अब बाहिरका कार्यक्रममा नहिड्ने’ भनेका प्रधानमन्त्री भनाईको २४ घण्टा नपुग्दै गोरखाको नेकपा माओवादी केन्द्र वडा कमिटी बैठकमा समेत सहभागी हुनुभएको छ । 

प्रधानमन्त्री पुष्पकमल दाहालले आफ्नो कार्यकालको एक वर्ष पूरा भएको अवसरमा मंगलबार देशवासीलाई सम्बोधन गर्दै सरकारको कार्यशैली बदलिने बताउनुभएको थियो ।  ‘अब सरकारको कार्यशैली बदलिनेछ, केही पूर्व निर्धारित र अपरिहार्य बाहेक म बाहिरका कुनै पनि कार्यक्रममा नगई नयाँ नीति तथा कार्यक्रम र बजेटको तयारी एवं विकास र सुशासनमा रहेका समस्या समाधान गर्न लाग्ने निष्कर्षमा पुगेको छु’ सम्बोधनमा उहाँले भन्नुभएको थियो । प्रधानमन्त्रीले आफ्नो प्रतिवद्धता २४ घण्टा नपुग्दै तोड्नु भएको  छ  । 

आफ्नो प्रतिवद्धता विपरीत प्रधानमन्त्ती बुधबार माओवादी केन्द्र बारपाक सुलिकोट गाउँपालिका वडा नम्बर ८ कमिटीको बैठकमा समेत सहभागी हुनुभएको छ ।  प्रधानमन्त्रीले वडा कमिटी बैठकलाई सम्बोधन गर्दै मुलुकमा जनतालाई निराश बनाउन गणतन्त्रविरुद्ध भ्रम फैलाउने षड्यन्त्र हुन थालेको बताउनु भयो । ‘जनतालाई निराश हुनबाट तपाई हामी सबैले बचाउनुपर्छ’ उहाँले भन्नुभयो–  ‘‘एकथरी व्यक्ति सरकारबाट भएका राम्रा काम पनि देख्न नसक्ने, जनतालाई नदेखाउने र सकारात्मक कुनै पनि कुरा नगर्ने, खाली नकारात्मक मात्र कुरा गर्ने तथा जनतालाई निराश पार्ने षड्यन्त्र गरिरहेका छन् ।’

प्रधानमन्त्रीले गणतन्त्र विराधी गतिविधि रोक्न जनतालाई सम्झाउनु बुझाउनुपर्नेमा जोड दिनुभयो । 

प्रधानमन्त्रीले जनताले परिवर्तनको अनुभूति गर्नेगरी आगामी आर्थिक वर्षमा नयाँ ढङ्गले सरकारले बजेट ल्याउने गरी अहिलेदेखि नै तयारी थालिसकेको जानकारी गराउनुभएको छ ।  ‘परम्परागत रुपमा फागुनदेखि  बजेटका विषयमा छलफल गर्ने र जेठमा टुङ्ग्याउने परिपाटीको अव अन्त्य हुन्छ’ उहाँले भन्नुभयो ‘‘‘यस वर्ष सरकारले फागुनसम्ममा जनताले परिवर्तनको महशुस हुने गरी नयाँ ढङ्गले बजेटको टुङ्गो लगाइसक्छ ।’ 

प्रधानमन्त्रीले फरक प्रसङ्गमा वर्तमान सरकार र गठबन्धन अहिले झनै बलियो भएको उल्लेख गर्नुभयो । ‘अहिले गठबन्धन पाँचै वर्षसम्म जान्छ, तपाईहरु ढुक्क हुनुस्’ उहाँले भन्नुभयो– ‘कसैले कमजोर पार्ने प्रयास गरेपनि त्यो सफल हुदैँन, पाँचै वर्षसम्म सरकारमा हाम्रो बलियो उपस्थिति हुन्छ ।’