काठमाडौँ । पूर्वप्रधानमन्त्री तथा  नेकपा एकीकृत समाजवादी का सम्मानित नेता झलनाथ खनालले सरकारबाट प्रस्तुत आगामी आर्थिक वर्षको बजेट जनतामा आशाको सञ्चार गराउने किसिमको भएको बताउनुभएको छ ।

पूर्वप्रधानमन्त्री खनालले आज रासस केन्द्रीय कार्यालयमा समसामयिक विषयमा संवाद गर्दैविगतमा बजेट जनताका आमूलपरिवर्तनका अपेक्षा र चाहनालाई सम्बोधन नगरी आउने गरेकामा यस पटक भूमिसुधार, कृषि क्रान्ति, सहकारीकरण, औद्योगिकीकरण, शिक्षा, स्वास्थ्य लगायत क्षेत्रमा प्राथमिकतासहित आएको प्रतिक्रिया दिनुभएको हो ।   

सङ्घीय संसद्को संयुक्त बैठकमा मङ्गलबार अर्थमन्त्री वर्षामान पुनले आगामी आर्थिक वर्ष २०८१र८२ को बजेट प्रस्तुत गर्नुभएको थियो । सम्मानित नेता खनालले भन्नुभयो– ‘सरकारको नीति तथा कार्यक्रम र बजेटले गरिबी उन्मूलन, रोजगारी सिर्जना र युवाको विदेश बहिर्गमन रोक्ने कार्यक्रम ल्याएको छ । यसमा केही नवीनता छ । बजेटले सकारात्मक एवं आशा सञ्चार गरेको छ ।’

उहाँले आफूहरु राजनीतिक स्थिरता र समृद्धिका पक्षमा रहेको उल्लेख गर्दै बजेटमा भएका राम्रा कार्यक्रमको कार्यान्वयन पक्षको सफलतामा केन्द्रित हुनुपर्नेमा जोड दिनुभएको छ ।