काठमाडौँ । संक्रमणकालीन न्यायसम्बन्धी विधेयक (टीआरसी विधेयक)बारे प्रमुख ३ दलका शीर्ष नेताहरुबीच  छलफल भएको छ ।  विधेयकबारे प्रधानमन्त्री पुष्पकमल दाहाल प्रचण्डसहित नेपाली कांग्रेस, नेकपा एमाले र नेकपा माओवादी केन्द्रका नेताहरुबीच छलफल भएको हो । 

प्रधानमन्त्री निवास बालुवाटारमा सोमबार साँझ शुरु भएको छलफलमा प्रचण्डसहित कांग्रेस सभापति शेरबहादुर देउवा, उपसभापति पूर्णबहादुर खड्का, धनराज गुरुङ र राष्ट्रियसभाका पूर्वसदस्य तथा वरिष्ठ अधिवक्ता राधेश्याम अधिकारी सहभागी हुनुभएको छ । प्रमुख प्रतिपक्ष दल एमालेबाट अध्यक्ष केपी शर्मा ओली, पूर्वमन्त्री अग्नि खरेल र संसदीय दलका सचेतक महेश बर्तौला सहभागी हुनुभएको प्रधानमन्त्रीको सचिवालयले जानकारी दिएको छ । प्रधानमन्त्रीको सचिवालयका अनुसार छलफलमा माओवादी केन्द्रबाट उपमहासचिव वर्षमान पुन र नेता खिमलाल देवकोटा सहभागी हुनुभएको छ । 

बेपत्ता पारिएका व्यक्तिको छानविन र सत्य निरुपण तथा मेलमिलाप आयोगसम्बन्धी विधेयक अहिले  प्रतिनिधिसभाको समितिमा विचाराधीन छ । विधेयकका अन्तर्वस्तुमा प्रमुख दलबीच सहमति नजुट्दा विधेयक अघि बढ्न सकिरहेको छैन । 

विधेयकबारे प्रमुख ३ दलका शीर्ष नेताहरुबीच आइतबार पनि छलफल भएको थियो । प्रमुख दलका शीर्ष नेताहरुबीच विधेयकको बारेमा त्यसअघि पनि विभिन्न पटक छलफल हुँदै आएको थियो ।  शीर्ष नेताहरुबीचको विभिन्न चरणको छलफलपछि  सोमबारको बैठकमा अन्य नेताहरुलाई पनि सहभागी गराइएको हो ।