धरान । बुढासुब्बा गोल्डकपको २४ औँ संस्करणको तयारी पूरा भएको छ । यही फागुन २६ देखि चैत ३ गतेसम्म सञ्चालन हुने उक्त प्रतियोगिताको खेलतालिका पत्रकार सम्मेलनमार्फत सार्वजनिक गर्दै आयोजक धरान फुटबल क्लबले तयारी पूरा भएको जानकारी दिएको हो । प्रतियोगितामा  आठ समूहले प्रतिस्पर्धा गर्नेछन् ।

फागुन २६ गतेको उद्घाटन खेल आयोजक धरान फुटबल क्लब र भारतको युकेएफसीबीच हुनेछभने फागुन २७ मा एनआरटी  र त्रिभुवन आर्मी क्लब भिड्ने छन् । फागुन २८ गते नेपाल पुलिस क्लब र मोरङ फुटबल क्लब र फागुन २९ गते काँकडभिट्टा फुटबल ट्रेनिङ सेन्टर र चर्च ब्वाईज युनियनबीच स्पर्धा हुनेछ । 

धरान फुटबल क्लबका अध्यक्ष प्रताप तामाङका अनुसार  विजेता टिमले नगद  १० लाख र उपविजेताले ५ लाख रुपैयाँसहित पदक तथा पुरस्कार प्राप्त गर्नेछन् । उत्कृष्ट खेलाडीले एक लाख, प्रत्येक खेलको म्यान अफ द म्याचले १० हजार, उत्कृष्ट गोलरक्षक, उत्कृष्ट डिफेन्डर, उत्कृष्ट मिडफिल्डर, उत्कृष्ट स्ट्राइकरका साथै उत्कृष्ट प्रशिक्षकलाई जनही २५ हजार रुपैयाँ र प्रतियोगितामा सर्वाधिक गोल गर्ने खेलाडीलाई ३५ हजार रुपैयाँ प्रदान गरिनेछ । 

प्रतियोगिता संचालनको लागि ७७ लाख ६० हजार रुपैयाँ जुटाइने तथा  ६६ लाख ५५ हजार रुपैयाँ खर्च हुने आयोजकको अनुमान छ ।