धनुषा ।  पूर्वअर्थमन्त्री तथा नेकपा एमालेका उपाध्यक्ष विष्णु पौडेलले देशको अर्थतन्त्रको  नीति र प्रक्रियामा नै सुधार गर्न जरुरी रहेको बताउनुभएको छ ।

एमाले उपाध्यक्ष पौडेलले आइतबार जनकपुरधाम विमानस्थलमा सञ्चारकर्मीसँग नीति र प्रक्रिया अङ्गीकार गरे मात्रै अर्थतन्त्र सुधार हुँदै जाने बताउनुभएको हो । ‘एमालले अर्थमन्त्रालयको जिम्मा लिएका समयमा ठीक नीति र प्रक्रिया अङ्गीकार गरेकाले अथर्गतन्त्र सुधार भएको देखिन्थ्यो’ उहाँले भन्नुभयो– अहिले त्यो अवस्था छैन । अर्थतन्त्रका सबै सूचक समस्यामा छन् ।’

पूर्वअर्थमन्त्री पौडेलले मुलुकका समस्या समाधान र जनहितका लागि आफूहरू सबै दलसँग सहकार्यका लागि तयार रहेको बताउनुभयो । उपाध्यक्ष पौडेलले लेनदेनका आधारमा बनेको वर्तमान सत्ता गठबन्धन आफूभित्रका समस्याका कारण लामो समय टिक्ने कुनै आधार नभएको बताउनुभयो । सत्ता र शक्तिका लागि एमालेलाई कुनै चिन्ता नभएको भन्दै जनहितका लागि सदैव सरोकार राख्ने बताउनुभयो ।  ‘हाल देखिएका समस्या समाधान गर्न एमाले सबै पार्टीसँग सहकार्य गर्न तयार छ’ उहाँले भन्नुभयो– ‘पद र सत्तालाई हामीले प्राथमिकतामा राखेका छैनौँ ।’

अध्यक्षका लागि बनाइएको माला पौडेललाई
धनुषाको क्षीरेश्वरनाथ नगरपालिकास्थित महेन्द्रनगरमा जारी प्रथम राष्ट्रिय महिला हक्की प्रतियोगिताको समापनका लागि एमाले अध्यक्ष केपी शर्मा ओली आउने कार्यक्रम थियो । उहाँको स्वागतका लागि दुई सय किलोको माला उनेर राखेको थियो । 

अध्यक्ष ओली यहाँ नआएर उपाध्यक्ष पौडेल आउने कार्यक्रम तय भएपछि सोही मालाले उपाध्यक्ष पौडेललाई स्वागत गरिएको ९नेकपा० एमाले जनकपुरधाम नगर कमिटी अध्यक्ष सुरेन्द्र भण्डारीले जानकारी दिनुभयो । एमाले जनकपुरधाम उपमहानगर कमिटीले माला तयार गरेको थियो । ‘अध्यक्ष कमरेड आउने भनेपछि हामीले माला उनेका थियौँ । मौसम खराबीका कारण आउनसक्नु भएन् । उहाँको सट्टमा उपाध्यक्ष पौडेललाई लगाइदियौँ’ नगर अध्यक्ष भण्डारीले भन्नुभयो । 

फागुन १४ गतेदेखि शुरु भएको प्रथम मदन भण्डारी कप राष्ट्रिय महिला हक्की प्रतियोगिताको आज समापन हुँदैछ । पूर्वराष्ट्रपति विद्यादेवी भण्डारीले प्रतियोगिताको उद्घाटन गर्नुभएको थियो ।