काठमाडौँ । प्रधानमन्त्री केपी शर्मा ओली र मल्दोभाका उपप्रधानमन्त्री एवं परराष्ट्रमन्त्री मिहेल पोप्सोइबीच भेटवार्ता भएको छ । नेपाल भ्रमणमा रहनुभएका उपप्रधानमन्त्री पोप्सोइले आज  बालुवाटार पुगेर प्रधानमन्त्री ओलीसँग शिष्टाचार भेटवार्ता गर्नुभएको हो ।

भेटवार्तामा उहाँहरुबीच दुई पक्षीयसम्बन्ध र हितका विषयमा छलफल भएको प्रधानमन्त्रीको सचिवालयले जनाएको छ । प्रधानमन्त्रीको सचिवालयका अनुसार उहाँहरुबीच जलवायु परिवर्तन, शिक्षा, संस्कृति र व्यापारिकसम्बन्ध विस्तारका क्षेत्रमा सहकार्य गर्ने विषयमा समेत छलफल भएको छ।

प्रधानमन्त्री ओलीले हिमालदेखि समुुद्रसम्मको सुरक्षालाई केन्द्रमा राखेर जलवायु परिवर्तनका मुद्दामा नेपालले आगामी जेठ २ देखि ४ गतेसम्म काठमाडौैँमा हुने सगरमाथा संवाद कार्यक्रममा सहभागिताका लागि उहाँलाई आग्रह गर्नुभएको छ । 

भेटवार्तामा प्रधानमन्त्रीका मुख्य सल्लाहकार विष्णुप्रसाद रिमाल, परराष्ट्र मन्त्रालयका सहसचिव गणेशप्रसाद ढकाल लगायत सहभागी हुनुहुन्थ्यो ।