काठमाडौँ । बालिकालाई घरेलु बालश्रमिक राखेको मुद्दामा सरकारी वकिलले मुद्दा नचलाउने तयारी गरेपछि काठमाडौँ महानगरपालिकाका मेयर बालेन शाहले सटिक टिप्पणी गर्दै सरकारलाई व्यंङग मिश्रित चेतावनी दिनुभएको छ ।  

मेयर शाहले सामाजिक सञ्जाल फेसबुकमा लेख्नुभएको छ, "सरी नानु, तिम्रा पीडकका विरूद्धमा मुद्दा नचल्ने बनाएछ सरकारले । नआत्तिनु । समय आउनेछ ।"

एमाले लुम्बिनी प्रदेशसभा सदस्य रेखाकुमारी शर्माले घरमा बालश्रमिक राखेको मुद्दा महान्यायाधिवक्ताको कार्यालयमा पुगेको छ । शर्माको घरमा ६ वर्षदेखि काम गरिरहेकी बालिकाले आफूमाथि कुटपिट गरेको बताएकी थिइन् । महानगरपालिकाले उनको उद्धार गरेको थियो । उद्धारपछि महानगरपालिकाको नगर प्रहरी, वडाका प्रतिनिधि र प्रहरीले घटनास्थलको मुचुल्कासमेत गरेका थिए । यो घटनामा मेयर शाहले लेख्नुभएको छ, यस्तै विभेद, अपराध मास्न अनि ती कुकर्म गर्नेहरूलाई तह लगाउन तिमी र तिमीजस्तै धेरै नानीबाबुले पढ्न पर्छ । समाज बुझ्नपर्छ ।

गत जेठ १४ मा काठमाडौँ महानगरपालिकाले १४ वर्षीया किशोरीको एमले प्रदेश सांसद शर्माको घरबाट उद्धार गरेको थियो । उनलाई उद्धार गर्नुअघि महानगरका इन्टर्न विद्यार्थीले उनी पढ्ने विद्यालयमा आमाबाबु र नातागोताबाहेकको व्यक्तिको घरमा बस्ने बालबालिकाको अवस्था तथा तथ्यांक विश्लेषण गर्न फारम भराएका थिए । फारम भर्ने क्रममा कक्षा ७ मा अध्ययनरत ती किशोरीले आफूलाई सांसद शर्माले घरेलु कामदारका रूपमा राखेको, शर्माको घरमा खाना पकाउने, कपडा धुने, फूलबारी गोडमेल गर्ने, झाडु पोछा लगाउने काम गराएको र शर्माले आफूलाई हात र पाइपले कुट्ने गरेको पनि खुलाएकी थिइन् ।