काठमाडौँ ।  काठमाडौँको  पिंगलास्थानस्थीत वागमती होटलमा युवती मृत फेला परेको चार दिनपछि उनीसँगै होटल गएका युवकको पनि शव फेला परेको छ । शनिबार ओखलढुंगाको सुनकोशी गाउँपालिका–३ सिस्नेरीस्थित जंगलमा रुखमा झुण्डिएको अवस्थामा युवकको शव फेला परेको जिल्ला प्रशासन कार्यालय, ओखलढुंगाका प्रमुख जिल्ला अधिकारी डा।नारायण ढकालले जानकारी दिनुभयो । 

मंगलबार कागेश्वरी मनोहरा–२ की २१ वर्षीया सुस्मिता खड्का र ओखलढुंगाका २३ वर्षका टेकबहादुर थापा उक्त होटलमा बास बसेका थिए । भोलिपल्ट अंग्रेजी नयाँ वर्षको दिन युवती खड्काको शव फेला परेको थियो भने युवक बेपत्ता थिए ।

युवकले बाहिरबाट होटलको ढोका लगाएर बेपत्ता भएपछि प्रहरीले हत्याको आशंका गरेर अनुसन्धान गरिरहेको थियो । 

होटल प्रशासनले दुवै जना बसेको ३०८ नम्बरको कोठाको ढोका बुधबार अबेरसम्म नखुलेपछि प्रहरीलाई खबर गरेको थियो । प्रहरी अधिकृत र स्थानीय जनप्रतिनिधिको उपस्थितिमा ढोका खोल्दा खड्का मृत फेला परेकी थिइन् । 

काठमाडौँ महानगरपालिका–९ का वडा सदस्य टेकराज अधिकारीका अनुसार मृत भेटिएकी खड्काको मुखबाट फिँज आएको थियो ।