काठमाडौँ । माउण्टेन टेलिभिजनका संचालक राजुप्रसाद कँडेलविरुद्ध भ्रष्टाचार मुद्दा दायर भएको छ  । पद्या कोलनीका सञ्चालक समेत रहेका कँडेलविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको हो ।

विभिन्न विवादस्त गतिविधि गर्दै माउण्टेन टेलिभिजन खोल्न पुगेका कँडेल नागार्जुन नगरपालिकाका प्रमुख मोहनबहादुर बस्नेत प्रकरणमा अख्तियारको फन्दामा परेका हुन् । अख्तियारले नागार्जुन नगरप्रमुख बस्नेतविरुद्ध विशेष अदालतमा भ्रष्टाचार  र सम्पत्ति शुद्धिकरण सम्बन्धी मुद्दा दायर गरेको छ। 

नगरम्रमुख पदको दुरुपयोग गरेर आफ्नै नगरपालिका क्षेत्रमा रहेको पद्या कोलनी प्रालि, पद्या मर्चेन्ट कम्पनी र जगतगुरु कृपालु प्रतिष्ठान नेपालका लागि काम गरी नाजायज लाभ लिएको र राज्यकोषमा नोक्सानी हुने काम गरेको आरोप लागेको छ । कँडेल नगरप्रमुख बस्नेतलाई पद्या कोलनी प्रालि, पद्या मर्चेन्ट कम्पनी र जगतगुरु कृपालु प्रतिष्ठान नेपालसँग जोड्ने मुख्य योजनाकार हुन् । 

बस्नेतविरुद्ध  बजार मूल्य  ४७ करोड ७५ लाख भएको जग्गा पद्या कोलनीले जग्गाधनीलाई  १८ करोड ९४ लाख १८ हजार ४ सय ४८ रुपैया भएको उल्लेख गरी भुक्तान दिएको, राजश्व र बैनाबट्टा रकम समेत गरी  कूल २३ करोड २२ लाख २७ हजार मात्रै भुक्तानी गरेको  पाइएको आरोपपत्रमा उल्लेख छ । 

त्यो कार्यमा नगरप्रमुख बस्नेतको प्रत्यक्ष सहभागिता रहेको पाइएको आयोगको आरोप छ । नगरप्रमुख बस्नेत र उनकी श्रीमती उर्मिला बस्नेतको खातामा २ करोड १५ लाख ७३ हजार ३  सय ९५ रुपैया जम्मा गरेको पाइएको छ । यस्तै, ६ करोड ८२ लाख  रुपैयाँ बराबरको जग्गा र वैवाहिक भोज गर्दा  २४ लाख ७२ हजार ६ सय ३७ रुपैयाँ  बराबरको रकम समेत पद्या कोलनीका सञ्चालक राजुप्रसाद कँडेलले उपलब्ध गराएको आयोगले जनाएको छ ।

आयोगले ९ करोड २२ लाख ४६ हजार ३२ रुपैया बराबरको बिगो दाबी गर्दै नगरप्रमुख बस्नेत, उनका श्रीमती उर्मिला बस्नेत, पद्या कोलनीका सञ्चालक कँडेल विरुद्ध  मुद्दा दायर गरेको हो ।

आयोगले सम्पत्ति शुद्धिकरणसम्बन्धी कसुर गरेको अभियोगमा पनि प्रमुख बस्नेत, उनकी श्रीमती उर्मिला र पद्या कोलनीका सञ्चालक कँडेल्विरुद्ध १३ करोड १२ लाख ७३ हजार रुपैयाँ बराबरको बिगो दाबी गर्दै आइतबारै मुद्दा दायर गरेको आयोगका प्रवक्ता नरहरि घिमिरेले जानकारी दिनुभएको छ।