काठमाडौँ । प्रमुख प्रतिपक्ष दल नेकपा एमालेले राष्ट्रियसभा निर्वाचनमा १९ वटै सिटमा उम्मेदवारी दिने भएको छ ।

एमालेको शुक्रबार बसेको सचिवालय बैठकले राष्ट्रियसभा निर्वाचनमा सबै सिटमा उम्मेदवारी दिने गरेको निर्णय गर्दै महासचिव शंकर पोखरेलले जानकारी दिनुभएको छ । ‘प्रत्येक क्लस्टरमा ३ जनाको नाम मागेको थियो’ बैठकपछि उहाँले भन्नुभयो–  सिफारिस भएका नामको बारेमा प्रारम्भिक छलफल भयो । क्लस्टरमा पर्ने वा नपर्ने भन्ने विषयमा छलफल गरेर २३ गते १९ वटै उम्मेदवारको नाम सार्वजनिक गर्ने तयारी गरेका छौं ।’

एमालेले प्रदेश अध्यक्षबाट बिदा भएकासहित ६ जना नेतालाई केन्द्रीय सदस्य मनोनीत गरेको छ । कोशी प्रदेशबाट तुलसीप्रसाद न्यौपाने, बागमतीबाट केशवराज पाण्डे, कर्णालीका विनोद शाह, मधेशका रामअवतार यादव, सुदूरपश्चिमका दामोदर भण्डारी र झापाका जिल्ला अध्यक्ष दीपक कार्कीलाई केन्द्रीय सदस्यमा मनोनीत गरिएको महासचिव पोखरेलले बताउनुभयो ।