काठमाडौँ । प्रधानमन्त्री केपी शर्मा ओली र  संयुक्त अधिराज्यका राजदूत रब फेनबीच भेटवार्ता भएको छ ।

बेलायती राजदूतले आज प्रधानमन्त्री तथा मन्त्रिपरिषद्को कार्यालय पुगेर ओलीसँग भेटवार्ता भएको  हो । भेटवार्तामा उहाँहरुबीच दुई देशबीचको आपसी सम्बन्ध र हितका विषयमा छलफल भएको  प्रधानमन्त्रीको सचिवालयले जनाएको छ । 

 सचिवालयका अनुसार भेटवार्र्तामा प्रधानमन्त्रीले बेलायती राजदूतलाई नेपालको सङ्घीयता र लोकतन्त्रलाई सबल बनाउँदै सरकारले विकास, नीति निर्माणमा युवाहरुको सहभागिता वृद्धि र दिगो विकासका लक्ष्यको प्राप्तिलाई प्राथमिकतामा राखेको बताउनुभयो । 

प्रधानमन्त्रीले सरकार ‘समृद्ध नेपाल, सुखी नेपाली’को राष्ट्रिय आकाङ्क्षा पूरा गर्न क्रियाशील रहेकोे बताउनुभयो । उहाँले दुई ठूला दलबीचको सहकार्यमा सरकार गठन भएकाले यसप्रति जनताले राखेका अपेक्षा पूरा गर्न सरकार प्रतिबद्ध रहेको बताउनुभयो । 

राजदूत फेनले सङ्क्रमणकालीन न्यायसम्बन्धी कानुनका विषयलाई राजनीतिक सहमतिका आधारमा टुङ्गो  लागेकामा खुशी व्यक्त गर्दै नेपालको विकास, सुशासन र सङ्घीयताको सबलीकरण लगायत क्षेत्रमा बेलायत सरकारले गर्दै आएको सहयोग जारी रहने बताउनुभयो । उहाँले नेपाली व्यवसायीलाई बेलायतमा वस्तु निर्यातमा सघाउने प्रतिवद्धता पनि व्यक्त गर्नुभयो ।