काठमाडौँ । बंगलादेशमा विद्यार्थीले पुनः आन्दोलन चर्काएका छन् । पछिल्लो पटक उनीहरूको एकसूत्रीयु माग नै सरकारको राजीनामा रहेको बंगलादेशी सञ्चारमाध्यमहरूले जनाएका छन् । आन्दोलनका क्रममा मृत्यु भएका २ सयभन्दा बढी सहपाठीको न्यायका लागि भन्दै विद्यार्थीहरू पुनः सडकमा उत्रिएका हुन् ।

आइतबार अवामी लिगका कार्यकर्ता र आन्दोलनकारीबीच भएको झडपमा २ जनाको मृत्यु भएको छ । मुंशीगन्जमा भएको झडपमा ३० भन्दा बढी घाइते भएको बंगलादेशी सञ्चारमाध्यमहरूले जनाएका छन् । 

शनिबारसमेत ठूलो संख्यामा विद्यार्थीहरू ढाकाको सडकमा उपस्थित भएका थिए । केही ठाउँमा सुरक्षाकर्मीसँग झडपसमेत भएको थियो । झडपका क्रममा एक जना व्यापारीको मृत्यु भएको र कम्तीमा २० जना घाइते भएका थिए । 

यसैबीच प्रधानमन्त्री शेख हसिनाले विभेदविरोधी विद्यार्थी आन्दोलनका संयोजकहरूलाई वार्तामा बोलाएकी थिइन् । गणभवनको ढोका सधैँ खुल्ला छ । म कोटाविरोधी प्रदर्शनकारीहरूसँग कुरा गर्न चाहन्छु । उनीहरूको कुरा सुन्न चाहन्छु । म हिँसा चाहन्नँ, प्रधानमन्त्रीले हसिनाले भनेकी थिइन् । पेशाजीवी समन्वय परिषद्सँगको भेटमा उनले वार्ताको आह्वान गरेकी हुन् । तर आन्दोलनकारीहरू भने हसिनासँग वार्तामा नबस्ने अडानमा रहेका छन् ।