काठमाडौँ । नेकपा एमालेका अध्यक्ष केपी शर्मा ओली नेतृत्वको गठबन्धन सरकारमा ३ जना राज्यमन्त्री थपिएका छन् । 

राष्ट्रपति रामचन्द्र पौडेलले आज ३ राज्यमन्त्री नियुक्त गरी कार्यविभाजन तोक्नुभएको छ । राष्ट्रपतिले नेपालको संविधान बमोजिम ३ राज्यमन्त्री नियुक्त गरी कार्यविभाजन तोक्नुभएको शीतल निवासले जनाएको छ ।  

राष्ट्रपति कार्यालयका अनुसार संस्कृति, पर्यटन तथा नागरिक उड्डयन राज्यमन्त्रीमा अरुणकुमार चौधरी, वन तथा वातावरण राज्यमन्त्रीमा रुपा बिक र ऊर्जा, जलस्रोत र सिँचाइ राज्यमन्त्रीमा पूर्णबहादुर तामाङ नियुक्त हुनुभएको छ । 

उहाँहरुको आजै शपथ हुनेछ । यो विस्तारसँगै वर्तमान मन्त्रिमण्डल सङ्ख्या सङ्ख्या २५ पुगेको छ ।

गठबन्धन सरकारमा नेपाली कांग्रेसबाट बिक र  तामाङ तथा नागरिक उन्मुक्ति पार्टी (नाउपा)को रेशम चौधरी पक्षबाट अरुण चौधरीलाई राज्यमन्त्री बनाइएको हो । कांग्रेसबाट राज्यमन्त्री बन्नुभएका तामाङ रामेछाप, विक कपिलवस्तुबाट सांसद हुनुहुन्छ ।  

चौधरी कैलालीका प्रतिनिधिसभा सदस्य हुनुहुन्छ ।  चौधरी नाउपाको संसदीय दलका नेता समेत रहनुभएको छ । उहाँ रञ्जिता श्रेष्ठलाई हटाएर एक महिना अघि संसदीय दलको नेता बन्नुभएको हो ।