काठमाडौँ । पाकिस्तानी पूर्वप्रधानमन्त्री  इमरान खानकी पत्नी बुशरा बीबीले उच्च अदालतमा पुनरावेदन गर्नुभएको छ । पाकिस्तान तेहरीक–ए–इन्साफ (पिटिआई) का संस्थापक  खानकी पत्नी बुशराले पाकिस्तानस्थित तोसाखानाको तेस्रो मुद्दामा गिरफ्तारीविरूद्ध उच्च अदालतमा पुनरावेदन गर्नुभएको हो ।  

उहाँले अधिवक्ता सरदार लतिफ खोसामार्फत  पुनरावेदन दायर गरेको पाकिस्तानी पत्रिका  डनले जानकारी गराएको छ । इमरान खान र बुशरा बीबीलाई तोसखाना मुद्दामा जमानत दिएता पनि पुन: पक्राउ गरिएको थियो । 

रावलपिन्डीको अदियाला जेलमा गिरफ्तारीको क्रममा आफुहरूमाथि अपमान गरेको पुनरावेदनमा उल्लेख छ । साथै यसमा बुशरा बीबीलाई तेस्रो मामिलामा एनएबी अध्यक्षको पक्राउपूर्जी बिना नै पक्राउ गरी राजनीतिक उत्पीडनसहित  जेलमा राखिएको दाबी गरिएको छ ।  निवेदनकर्ताले आक्रमणमा संलग्न जेलर तथा महिला अधिकारीविरुद्ध कारबाही गर्न अदालतलाई अनुरोध गर्दै गिरफ्तारीलाई अवैध घोषणा गर्नसमेत आग्रह गर्नुभएको छ ।  यसैबीच, इमरान खानले पनि लाहोर उच्च अदालतमा पुनरावेदन दायर गरी आफूविरुद्धका मुद्दाको विवरण मागेको डनले जनाएको छ । 

सन् २०१८ देखि सन् २०२२ सम्म पाकिस्तानी प्रधानमन्त्रीको रहनुभएका खान  अगस्ट २०२३ देखि तोसाखाना, साइबर आक्रमण र गैरकानुनी विवाह लगायतका अभियोगमा जेल जीवन  विताइरहनु भएको छ ।  उहाँकी श्रीमती पनि महिनौँदेखि जेलमा हुनुहन्छ ।