कृष्णबन्धु अर्याल
स्याङ्जा । पुतलीबजार नगरपालिकाको वडा नम्बर १३ स्थित मातृभूमि खेलमैदान बिस्तार गर्नको लागि महायज्ञ आयोजना गरिएको छ । जिल्लाकै पुरानो खेलमैदान बिस्तार गर्नको लागि स्थानीय स्मृति युवा क्लबको आयोजनामा साउन १३ गतेदेखि महायज्ञ थालिएको हो । 

विदुषी सुधादेवी अच्युत प्रियाजी  र रामप्रपन्नाचाॠ (ऋषि गुरु) प्रमुख वाचक तथा उमेश पण्डित उपवाचक रहनुभएको महायज्ञमा खेलमैदानको लागि जग्गा दान गर्नेहरु बढ्दै गएका छन् । महायज्ञमा अहिलेसम्म अस्विनकुमार अर्याल, दीपक अर्याल, दिनेश अर्याल र जमुना अर्यालले खेलमैदानको लागि जग्गा प्रदान गरिसक्नुभएको छ । आँधिखोलाको किनारमा रहेको मैदान वर्षेनी कटान हुँदै साँघुरिदै गएकोले त्यसलाई बिस्तारको लागि जग्गा प्रदान गरिएको दीपक अर्यालले बताउनुभयो । 

महायज्ञमा अझै नगदको साथै जग्गा प्रदानगर्ने क्रम चलिरहेको जिल्लाकै पुरानो विद्यालय मातृभूमि मा.विका पूर्व प्रध्यानाध्यापक अस्विनकुमार अर्यालले बताउनुभयो । ‘हाम्रै आगन अगाडि रहेको खेल मैदान हाम्रो गहना हो, यसलाइ संरक्षण गर्नु हाम्रो दायित्व पनि हो’ उहाँले भन्नुभयो– खेलमैदानको लागि दान गर्ने दाताहरु बढिरहेका छन् ।  मैले पनि यसैसँगै जोडिएको जग्गा प्रदान गर्न पाउँदा गौरव महशुस गरेको छु।’ 

क्लबका अध्यक्ष भीम रानाले खेलमैदान बिस्तार, स्तरोन्नति र संरक्षण गर्ने उदेश्यले महायज्ञ आयोजना गरिएको बताउनुभयो । ‘हामीले यस महत्वपूर्ण स्थानमा रहेको खेलमैदानलाई स्तरोन्नति ,संरक्षण र पैवद्धन गर्न महायज्ञको आयोजना गरेका हौँ’ उहाँले भन्नुभयो ।  

मैदानमा बेला बेलामा फुटबल , क्रिकेट र भलिबल लगायतका खेल संचालन हुँदै आएको छ। क्लबका सचिव मीनप्रसाद अर्यालले विगतमा यही मैदानमा खेल अभ्यास गरेकाहरु राष्ट्रियस्तरका खेलाडी बन्न सफल भएको उल्लेख गर्नुभयो । ‘त्यसैले यसलाई जोगाइ राख्न सके यो मैदानबाट भावी पिँढीले पनि प्रचुर लाभ लिन सक्ने छन्’ उहाँले भन्नुभयो । 

श्रावणी, ,श्रावण स्नान, रुद्राभिषेक (रुद्रीपाठ), सहश्र जलधारा, बेलपत्र अर्पण, शिव महापुराण पाठ पारायणसहित आयोजना गरिएको महायज्ञ साउन २१ गतेसम्म संचालन गरिने भएको छ ।