बाँके । आषाढ शुक्ल पूर्णिमा अर्थात गुरु पूर्णिमा आज मधेसी समुदायले भौंरी पर्व मनाएका छन । यो पर्व बाँके, बर्दिया, दाङ्ग, कपिलवस्तुलगायत मधेसी समुदायको बहुल्यता भएको स्थानमा मनाउने गरिन्छ । 

यो पर्व मान्ने समुदायका व्यक्तिहरु विहानै घरको गोठ लिपपोत गर्छन । भौंरी पकाउन गुहुँको पिठो मुछी पूर्णिमा आर्थत् पूर्ण गोलो आकारको परिकार बनाउने गरिएको बाँके डुडुवा गाउँपालिका–५ अगुव तिरथराम यादवले बताउनुभयो ।

गोलो अकारको परिकार बनाई गाईगोरुको गोबरबाट बनेको कन्डा अर्थात गुँइठा बनाई गाईगोरु बस्ने गोठमै कन्डाको आगो तयार गरिन्छ । सोही आगोमा उक्त गोलो आकारको पिठोको परिकार पकाउने गरिन्छ, जसलाई भौरी भन्ने गरिन्छ । 

अवधी समुदायमा यो पर्वको छुट्टै महत्व छ । गाई गोरु नै घरको सम्पत्ति हो भन्ने विश्वासले गोठमै पकाउने परम्परा छ । यी परिकारहरु विधिवत रुपले पकाइ सकेपछि केराको पातमा राखी अगियार अर्थात पूजा गर्ने गरिन्छ ।

घरमा पालेको गाई गोरुलाई भौंरी खुवाईसकेपछि मात्रै घरका अन्य सदस्यले खाने चलन छ । विशेष गरी दही, भेली र चिनीसँग भौंरी खाने गरिन्छ । आजकै दिनमा मधेसी समुदायमा विवाहित छोरी माइत जाने र ज्वाँइलाई ससुरालीमा बोलाएर भाैँरीसँग मिठो परिकार खाने खुवाउने प्रचलन रहेको नेपालगन्ज–६ का शिवप्रसाद पाठकले बताउनुभयो ।