तनहुँ । तनहुँमा एक वर्षको अवधिमा तीन लाख बढी पशुमा पूर्ण खोप लगाइएको छ । भेटेरिनरी अस्पताल तथा पशुसेवा विज्ञ केन्द्रले गत आर्थिक वर्ष २०८०र८१ मा जिल्लाका दश पालिकामा ३ लाख ७७ हजार २४ पशुलाई पूर्ण खोप लगाएको हो । 

रोगका कारण हुने पशुजन्य उत्पादनको कमीलाई रोक्न  खोपका माध्यमबाट पशुधनको सुरक्षा तथा उत्पादन वृद्धिका लागि तनहुँका सबै पालिकाका पशुमा खोप लगाइएको केन्द्रका प्रमुख डा राजेश चौधरीले जानकारी दिनुभयो । 

गण्डकी प्रदेश सरकारले प्रदेशलाई पूर्ण खोपयुक्त बनाएर सङ्क्रामक रोग निमूल पार्ने लक्ष्य राखेको छ । तनहुँमा व्यावसायिक पशुपालन बढिरहेकाले यहाँबाट विभिन्न जिल्लामा पशुजन्य पदार्थको आयातनिर्यात हुने भएकाले पूर्ण खोप अभियान सञ्चालन गरिएको चौधरीको भनाइ छ । 

पशुबाट मानिस र मानिसबाट पशुमा सर्ने जुनोटिक रोगलाई नियन्त्रण गरी जनस्वास्थ्यलाई पार्ने नकारात्मक प्रभावबाट बचाउन र पशुजन्य रोगको उपचार तथा नियन्त्रण गर्दा लाग्ने समय र खर्चको बचतका लागि पूर्ण खोप कार्यक्रम प्रभावकारी बन्ने चौधरीले उल्लेख गर्नुभयो । 

चौधरीका अनुसार जिल्लाका ८५ वडाका ३४ हजार ९ सय ३० घरधुरीले पालेका पशुमा पूर्ण खोप लगाइएको छ । उहाँका अनुसार सबैभन्दा बढी बाख्रामा पूर्ण खोप लगाइएको छ । बाख्रापालनतर्फ कृषकको आकर्षण बढेसँगै धेरै बाख्राहरुमा पूर्ण खोप लगाइएको चौधरीले बताउनुभयो । त्यसपछि गाई, भैँसी, बङ्गुर, कुकुर, भेडा र बिरालोमा पूर्ण खोप लगाइएको छ । 

चौधरीका अनुसार २  लाख २५ हजार ५ सय १५ बाख्रा, ५६ हजार हजार ३ सय १९ गाइ, ५३ हजार ९ सय ७९ भैँसी, २२ हजार छ सय ३५ बङ्गुर, १७ हजार ८ सय ८९ कुकुर, पाँच सय २६ भेडा र ४  सय ३१ बिरालोलाई पूर्ण खोप लगाइएको छ । 

व्यास नगरपालिकाका ८० हजार ५  सय २७, शुक्लागण्डकी नगरपालिकाका ३६ हजार चार सय ३२, भिमाद नगरपालिकाका ६० हजार ६ सय ४३, भानु नगरपालिकाका ४९ हजार ३७, घिरिङ गाउँपालिकाका २५ हजार नौ सय, ऋषिङ गाउँपालिकाका ३४ हजार एक सय २८, बन्दीपुर गाउँपालिकाका २१ हजार ७ सय ६६, आँबुखैरेनी गाउँपालिकाका १९ हजार ९ सय २५, देवघाट गाउँपालिकाका २७ हजार ६ सय २२ र म्याग्दे गाउँपालिकाका २१ हजार ४१ पशुमा पूर्ण खोप लगाइएको केन्द्रले जनाएको छ । 

पशुमा पूर्ण खोप कार्यक्रम सञ्चालनका लागि ९२ खोपकर्ता र गणक नियुक्ति गरिएको थियो । खोपकर्तालाई अभिमुखीकरण गरी सम्बन्धित वडामा खटाइएको केन्द्रले जनाएको छ ।