बैतडी ।  जिल्लाको पाटनमा महिला सुरक्षित आवास गृह(सेफ हाउस) को आफ्नै भवन निर्माण गरिएको छ ।

गत आर्थिक वर्षमा सङ्घीय सरकारले पाटन नगरपालिकामार्फत सेफ हाउसको भवन निर्माण गर्न ८० लाख रुपैयाँ विनियोजन गरेको थियो । ठेक्का प्रक्रियामार्फत धर्मदेव निर्माण सेवाले  ५२ लाख रुपैयाँको लागतमा त्यो भवन निर्माण गरेको हो । 

सम्झौताअनुसार भवन निर्माणपछि नगरपालिकालाई हस्तान्तरण गरिएको निर्माण व्यवसायीय दिनेश लामिछानेले बताउनुभयो । पाटनमा २०७३ साल भदौदेखि महिला सुरक्षित आवास गृह सञ्चालित छ । सेफ हाउस सञ्चालन भएको सात वर्षपछि आफ्नै भवन निर्माण बनेको सेफ हाउसका मनोविमर्शकर्ता डम्मरी भट्टले बताउनुभयो । अहिले आफ्नै भवनबाट सेवा प्रवाश भइरहेको उहाँले जानकारी दिनुभयो ।  

पाटन नगरपालिकाको अगुवाइमा भवन निर्माण भएपछि चालु आर्थिक वर्षदेखि सेफ हाउस सञ्चालन तथा व्यवस्थापनको जिम्मा नगरपालिकाले लिएको हो । यसअघि सहस्त्रलिङ्ग सामुदायिक संस्थाले व्यवस्थापन गर्दै आएको थियो । सेफ हाउस सञ्चालनमा साथी नामक संस्थाले सहयोग गर्दै आइरहेको छ । यहाँबाट अहिले हिंसा प्रभावित चार जना महिलाका साथै तीन बालबालिकाले सेवा लिइरहेका मनोविमर्शकर्ता भट्टले जानकारी दिनुभयो ।