कैलाली ।  कैलालीको सत्ती भन्सार कार्यालयले चालु आर्थिक वर्ष २०८०/८१ को ११ महिनामा ९ करोड ८० लाख ७८ हजार राजश्व सङ्कलन गरेको छ । 

सत्ती भन्सार कार्यालयले चालु आवमा  १२ करोड एक लाख ४७ हजार रुपैयाँ राजश्व सङ्कलन गर्ने लक्ष्य लिएको थियो ।  अबको १५ दिनमा त्यो लक्ष्यमा पुग्न मुश्कील हुने देखिन्छ । गत वर्षको तुलनामा यस वर्ष राजश्व बढ्ने सत्ती भन्सार कार्यालयका प्रमुख दिनहरि सापकोटाले बताउनुभयो ।

गत आर्थिक वर्षमा सो भन्सार कार्यालयले  १६ करोड ९४ लाख ४१ हजार रुपैयाँ राजश्व सङ्कलन गर्ने लक्ष्य लिएको थियो । तर त्यस आवमा ७ करोड ५० लाख ४० हजार रुपैयाँ मात्र राजश्व सङ्कलन भएको प्रमुख सापकोटाले बताउनुभयो । ‘यस वर्ष हामी लक्ष्य प्राप्तिको नजिक पुगेका छौैँ’ उहाँले भन्नुभयो ।

सत्ती भन्सार कार्यालयले प्रशासनिक सेवा शुल्कवाफत  ६४ हजार, बेरुजुबाट १ लाख, एकलौटी फार्म तथा व्यक्तिगत आयमा लाग्ने करतर्फ ४१ हजार, अन्तःशुल्क आयातमा २३ लाख ११ हजार,  भन्सार महशुल आयातमा ५ करोड एक लाख, कृषि सुधार शुल्कमा १ लाख ८ हजार,  भन्सार सम्बन्धी अन्य आयमा  ६ लाख ३९ हजार, मूल्य अभिवृद्धि कर आयातमा ४ करोड ४६  लाख ९७ हजार तथा हरित करबाट ४ हजार रुपैयाँ राजश्व सङ्कलनभएको प्रमुख सापकोटाले बताउनुभयो ।

सत्ती भन्सार भएर आयातको तुलनामा निर्यात शून्य रहेको छ । यस बाहेक जिल्लामा धनगढीस्थित त्रिनगर भन्सार कार्यालय रहेको छ । यस भन्सार भएर खाद्यान्न, लत्ताकपडा, दैनिक उपभोग्य सामग्री तेकुनियाँ भएर आयात गरिँदै आएको छ । खुला सीमाका कारण राजश्व सङ्कलनमा समस्या भएको प्रमुख सापकोटाको भनाइ छ ।