काठमाडौँ । प्रतिनिधिसभाको आइतबारको बैठक सांसद मञ्जु शर्मा अन्सारीको निधनप्रति शोक प्रस्ताव पारित गर्दै स्थगित भएको छ । 

सभामुख देवराज घिमिरेले बैठकले प्रतिनिधिसभा सदस्य शर्मा अन्सारीको निधनमा शोक प्रस्ताव सर्वसम्मतिले पारित गरेको जानकारी गराउनुभएको छ। बैठकमा स्वर्गीय अन्सारीको चिरशान्तिको कामना गर्दै एक मिनेट मौनधारण गरिएको थियो । अन्सारीको ६० वर्षको उमेरमा आइतबार उपचारका क्रममा निधन भएको हो । 

जनता समाजवादी पार्टी (जसपा) नेपालबाट विसं २०७९ को प्रतिनिधिसभामा समानुपातिक सदस्यका रुपमा निर्वाचित अन्सारीले विसं २०४६ को जनआन्दोलनबाट राजनीतिक यात्रा शुरुवात गर्नुभएको थियो । उहाँको निधनप्रति बैठकले शोक प्रकट गरी श्रद्धाञ्जलि अर्पण गर्दै शोक सन्तप्त परिवारप्रति समवेदन प्रकट गरेको छ । 

प्रतिनिधिसभाको अर्को बैठक सोमबार ११ बजे बस्ने भएको छ ।