काठमाडौँ । सुन तस्करी प्रकरणमा पूर्वसभामुख तथा नेकपा माओवादी केन्द्रका उपाध्यक्ष कृष्णबहादुर महरालाई मुद्दा  चलाइने भएको छ । 

सुन तस्करी सम्बन्धी छानविन गर्न गठित उच्चस्तरीय आयोगले पूर्वसभामुख तथा माओवादी केन्द्रका उपाध्यक्ष महरालाई मुद्दा चलाउन सिफारिस गरेको छ। गृह मन्त्रालय उच्च स्रोतका अनुसार, पूर्वन्यायाधीश डिल्लीराज आचार्य नेतृत्वको आयोगले महरालाई मुद्दा चलाउन सिफारिस गरेको हो ।

प्रधानमन्त्री पुष्पकमल दाहाल प्रचण्डले शुक्रबार सुनको अवैध पैठारी (तस्करी) नियन्त्रण सम्बन्धी जाँचबुझ आयोगको प्रतिवेदन अनुसार कारबाही थाल्न उपप्रधानमन्त्री एवं गृहमन्त्री रवि लामिछानेलाई निर्देशन दिनुभएको छ । प्रधानमन्त्रीले नै आयोगको सिफारिस अनुसार कारबाही थाल्न नर्दिेशन दिएपछि महरालाई मुद्दा चलाउने निश्चित भएको हो । 

भेपमार्फत भएको सुन तस्करी प्रकरणमा आयोगले महरालाई बयान समेत लिएको थियो । त्यही प्रकरणमा पूर्वसभामुख महराका छोरा राहुल पुर्पक्षका लागि थुनामा छन् । आयोगको सिफारिस र प्रधानमन्त्रीको निर्देशनपछि  पूर्वसभामुख महरामाथि कारबाही प्रकृया थाल्ने बाटो सहज भएको हो ।