काठमाडौँ । नवनियुक्त तीन प्रदेश प्रमुखको शपथ ग्रहण भएको छ । 

राष्ट्रपति रामचन्द्र पौडेलले मधेस प्रदेशका प्रमुख सुमित्रा भण्डारी, गण्डकी प्रदेशका प्रमुख डिल्लीराज भट्ट र सुदूरपश्चिम प्रदेशका प्रमुख नजिर मियाँलाई पद तथा गोपनीयताको शपथ गराउनुभएको हो । राष्ट्रपतिले उहाँहरुलाई बुधबार आयोजित विशेष समारोहमा नेपालको संविधानको धारा १६७ बमोजिम पद तथा गोपनीयताको शपथ गराउनुभएको शीतल निवासले जनाएको छ । 

मन्त्रिपरिषद्को फागुन २८ गतेको निर्णय एवं सिफारिस अनुसार राष्ट्रपतिले नेपालको संविधानको धारा १६३ को उपधारा (२) अनुसार आजै उहाँहरूलाई प्रदेश प्रमुखमा नियुक्त गर्नुभएको हो । 

शपथ ग्रहण समारोहमा उपराष्ट्रपति रामसहायप्रसाद यादव, प्रधानमन्त्री पुष्पकमल दाहाल ‘प्रचण्ड’, सभामुख देवराज घिमिरे, राष्ट्रियसभाका अध्यक्ष नारायणप्रसाद दाहालको उपस्थिति थियो ।