काठमाडौँ । प्रधानमन्त्री पुष्पकमल दाहाल ‘प्रचण्ड’ले विश्वासको मतका लागि संसदमा प्रस्ताव पेश गर्नुभएको छ । 

नेकपा माओवादी केन्द्रका अध्यक्ष समेत रहनुभएका दाहालले प्रधानमन्त्रीका लागि आफूलाई विश्वासको मत दिन नेपालको संविधानको धारा, १०० को उपधारा (२) बमोजिम प्रतिनिधिसभाबाट विश्वासको मत प्राप्त गर्न प्रतिनिधिसभा नियमावली, २०७९ को नियम १५५ बमोजिम प्रस्ताव पेश गर्नुभएको हो ।

प्रतिनिधिसभाको आजको बैठकलाई सम्बोधन गर्दै दाहालले आफूलाई प्रधानमन्त्रीका रुपमा विश्वासको मत दिने आग्रह गर्दै सो प्रस्ताव पेस गर्नुभएको हो । उहाँको सम्बोधनपछि अन्य पार्टीका शीर्ष नेताहरुले बैठकलाई दलीय आधारमा संसदमा धारणा राखिरहनुभएको छ । 

प्रधानमन्त्रीले सत्तागठबन्धन परिवर्तन गरेपछि र सरकारलाई समर्थन गरेको दल नेपाली कांग्रेसले यसअघि उहाँलाई दिएको समर्थन फिर्ता गरेपछि आज संसद्बाट विश्वासको मत लिनुपरेको हो ।