काठमाडौँ । राष्ट्रिय स्वतन्त्र पार्टी (रास्वपा) सभापति रवि लामिछानेकै नेतृत्वमा सरकारमा जाने भएको छ । प्रधानमन्त्री पुष्पकमल दाहाल ‘प्रचण्ड’कै नेतृत्वमा नयाँ सत्तासमीकरण बन्ने र रास्वपा पनि सरकारमा सहभागी हुने नेताहरूले बताएका छन् ।

सभापति एवं संसदीय दलका नेता लामिछानेकै नेतृत्वमा रास्वपा सरकारमा सहभागी हुने सो पार्टीको संसदीय दलका उपनेता विराजभक्त श्रेष्ठले जानकारी दिनुभयो । 

“हाम्रो नेतृत्व सभापतिबाट नै हो । अघिल्लोपटक पनि हामी उहाँकै नेतृत्वमा थियौँ । यसपटक पनि उहाँले नै नेतृत्व गर्नुहुनेछ,” उहाँ भन्नुभयो । रास्वपाले ४ मन्त्रालय दाबी गरेको उहाँले जानकारी दिनुभयो । कुन–कुन मन्त्रालय लिने भन्ने छलफलपश्चात् टुंगो लाग्ने उहाँको भनाइ छ । “चार मन्त्रालय हामीले पाउनुपर्छ भन्ने हो । यसो हुँदा व्यावहारिक हुन्छ भन्ने हाम्रो मान्यता हो ।” उहाँले भन्नुभयो ।