काठमाडौँ । राप्रपा नेपालका अध्यक्ष कमल थापाले चैत १५ गते भएको घटनालाई हिंसात्मक र उत्तेजित बनाउने काम सरकारबाट भएको बताउनुभएको छ । 

बिहीबार काठमाडौँमा आयोजित एक कार्यक्रममा थापाले राजवादीको विचारमाथि आक्रमण गर्ने र बदनाम गर्ने प्रयास स्वरुप सरकारले नै चैत १५ गते भएको घटनालाई हिंसात्मक र उत्तेजित बनाउने काम गरेको आरोप लगाउनुभएको हो । 


घटनाको निष्पक्ष छानविन नभइ एकपक्षीय ढंगले राजावादी र राजसंस्थालाई मुछ्ने काम भएको भन्दै उहाँले आपत्ति जनाउनुभयो । अध्यक्ष थापाले चैत १५ गतेको घटनालाई लिएर जनतामा भ्रम परेको भन्दै बिचलित नभइ अघि बढ्ने स्पष्ट पार्नुभयो । गणतन्त्र पक्षधर दल र केही सञ्चारमाध्यमले सिर्जना गर्न खोजेको भ्रमको तुवाँलो केही दिनपछि हटेर जाने उहाँको भनाइ छ।

उहाँले पूर्वराजालाई बदनाम गर्ने झुटा आरोप लगाउने र हिन्दुराष्ट्रको मान्यतालाई निषेध गर्ने, समाप्त पार्ने षडयन्त्रविरुद्ध सजक भएर प्रतिरक्षा गर्न सवै राष्ट्रवादी शक्तिहरु एक ठाँउमा उभिनुपर्नेमा जोडदिनुभयो । अब पनि राष्ट्रवादी शक्तिहरु एक ठाँउमा उभिन नसके भविष्यमा पछुताउनुपर्ने अवस्था आउने उहाँको धारण छ ।