काठमाडौँ ।  वरिष्ठ पत्रकार, लेखक तथा कूटनीतिज्ञ कमलप्रसाद कोइरालाको निधन भएको छ। पूर्वप्रधानमन्त्री मातृकाप्रसाद कोइरालाका सुपुत्र कोइरालाको  ८७ वर्षको उमेरमा सिनामङ्गलस्थित केएमसी अस्पतालमा उपचारका क्रममा आइतबार राति निधन भएको हो।

 कोइरालालाई केही दिनअघि अस्पताल भर्ना गरिएको थियो । ​ पत्रकार किशोर श्रेष्ठका अनुसार केही दिनअघि घरमै लडेर अचेत हुनुभएको थियो । त्यही कारण उहाँलाई तत्कालै अस्पताल लगिएको थियो । उहाँको उपचारकै क्रममा आइतबार राति ९ बजे कोइरालाको निधन भएको हो।

१९९५ वैशाखमा विराटनगरमा जन्मिएका  कोइराला एक प्रखर लेखक तथा राजनीतिज्ञका रूपमा चिनिनु हुन्छ । 

नेपालको प्रजातान्त्रिक आन्दोलनमा महत्वपूर्ण योगदान दिएका कोइराला परिवारमा जन्मिएर पनि वामपन्थी विचार बोक्ने कोइरालाले राजनीतिमा जेलनेल र कठोर दिन व्यतीत गर्नु भएको थियो । 

छापा पत्रकारितामा लामो समय सक्रिय वरिष्ठ पत्रकार कोइरालाले २०४७ सालपछि दृष्टि साप्ताहिकको प्रधान सम्पादकका रूपमा काम गर्नु  भएको थियो ।  त्यस बेला विचारका हिसाबले ‘दृष्टि साप्ताहिक’ नेकपा एमाले निकट छापा माध्यम थियो । उहााले लामो समय ‘साँघु साप्ताहिक’ मा स्तम्भ लेखन समेत गर्दै आउनु भएको थियो । 

२०५१ सालको मध्यावधि निर्वाचनमा मोरङ जिल्लाबाट निर्वाचित भएका कोइराला तीन वर्ष दक्षिण कोरियाका लागि नेपाली राजदूतका रहनु भएको थियो ।  सरल, मृदुभाषी र हास्यचेतसमेत राख्ने कोइरालाले एक सिद्धहस्त लेखक, पत्रकार, राजनीतिकर्मी र कूटनीतिक व्यक्तित्वका रूपमा योगदान गर्नु भएको छ । 

स्वर्गीय कोइरालाका एक छोरा र एक छोरी हुनुहुन्छ । 

कोइरालाको पार्थिव शरीरलाई श्रद्धान्जलीको लागि अहिले ११ बजेदेखि दिउँसो १ बजेसम्म नेकपा एकीकृत समाजवादीको मुख्यालय आलोकनगरमा राखिँदैछ । कोइरालाका अन्त्येष्टि आजै गरिने भएको छ ।