पर्सा  । वीरगञ्ज नाका हुँदै चालु आर्थिक वर्षको सात महिनामा ८ अर्ब ६८ करोड रुपैयाँ मूल्य पर्ने २२ करोड ६४ लाख ८ हजार २ सय २९ किलोग्राम धान आयात भएको छ । 

गत आवको सात महिनाको तुलनामा चालु आवको त्यही अवधिमा धानको आयात ७२ प्रतिशतले वृद्धि भएको हो । गत आवको त्यही अवधिमा यो नाका हुँदै ४ अर्ब ९१ करोड मूल्य पर्ने १३ करोड १८ लाख ५९ हजार चार सय १६ किलोग्राम धान आयात भएको थियो । वीरगञ्ज भन्सार कार्यालयका सूचना अधिकारी अमित तिवारीले चालु आवको सात महिनामा धान र चामलको आयातमा वृद्धि भएको बताउनुभयो । ‘गत आवको सात महिनाको तुलनामा चालु आवको  त्यही अवधिमा धान–चामलको आयात बढेको देखिन्छ’ उहाँले भन्नुभयो । 

कृषिप्रधान मुलुक नेपालमा धान मात्र नभएर चामल पनि विदेशी मुलुकबाट आयात हुँदै आइरहेको छ । चालु आवको सात महिनामा यो नाका हुँदै १ अर्ब ३५ करोड मूल्यको  एक करोड ३३ लाख ७४ हजार आठ सय २६ किलोग्राम चामल आयात भएको छ ।
 
जबकि गत आवको त्यही अवधिमा भने १ अर्ब ६ करोडको ८१ लाख १७ हजार एक सय ३० किलोग्राम चामल आयात भएको थियो । चालु आवको सात महिनामा २ अर्ब ९६ करोड मूल्यको पाँच करोड ७७ लाख १४ हजार पाँच सय ८३ किलोग्राम मकै आयात भएको छ । 

जबकि गत आवको त्यही अवधिमा भने २ अर्ब ९७ करोड मूल्य पर्ने छ करोड ६० लाख ४९ हजार ९सय ७२ किलोग्राम मकै आयात भएको थियो । गत आवको तुलनामा चालु आवको सोही अवधिमा मकैको आयातमा भने सामान्य कमी देखिएको छ ।