काठमाडौँ । माघमा मात्रै मुलुकभर ४ सय ७८ वटा आगलागीका घटना भएका छन् ।  आगलागीबाट २२ जनाको मृत्यु भएको छ । 

आगलागीबाट ११ पुरुष, १० महिला र एक बालकको मृत्यु भएको नेपाल प्रहरीका प्रवक्ता, प्रहरी नायव महानिरीक्षक दिनेशकुमार आचार्यले जानकारी दिनुभएको छ । प्रहरीका प्रवक्ता आचार्यका अनुसार आगलागीमा २६ पुरुष, ५४ महिला, चार बालक र तीन बालिका गरी ८७ जना घाइते भएका छन् । आगलागीबाट १७ परिवार विस्थापित भएको प्रहरी प्रधान कार्यालयले जानकारी दिएको छ । आगलागी नियन्त्रणमा ३ हजार ५०३ जना प्रहरी परिचालन भएको पनि आचार्यले बताउनुभयो । 

सबैभन्दा बढी कोशी प्रदेशमा आगलागी एक सय २९ वटा आगलागीका घटना भएको छ । त्यसपछि मधेशप्रदेशमा ८९, बागमती प्रदेशमा ४२, काठमाडौँ उपत्यकामा ३७, गण्डकी प्रदेशमा ३९, लुम्बिनी प्रदेशमा ६३, कर्णाली प्रदेशमा ३२ र सुदूरपश्चिम प्रदेशमा ४७ आगलागीका घटना भएको प्रहरीले जानकारी दिएको छ । प्रहरी प्रवक्ता आचार्यले ती आगलागीबाट ६८ वटा घर, ६६ वटा गोठमा क्षति भएको छ । 

कूल दुई सय ४७ वटा पशुचौपाय क्षति भएको छ । ती आगलागीबाट १८ करोड ४८ लाख रुपैयाँ भन्दा बढीको आर्थिक क्षति भएको प्रहरी प्रधान कार्यालयले सार्वजनिक गरेको विवरणमा उल्लेख छ ।