धादिङ । काठमाडौँबाट ग्यास बोकेर नुवाकोटको त्रिशूली जाँदै गरेको गाडीमा ग्यास लिक लिकहुँदा राजमार्ग अवरुद्ध भएको छ । आज काठमाडौँबाट त्रिशूली जानेक्रममा धादिङको धुनीवेशी नगरपालिका ९ बाहुनडाँडामा पुग्दा गाडीमा रहेको एमोनिया ग्यास लिक भएको हो।

राजमार्ग सुरक्षा तथा ट्राफिक व्यवस्थापन कार्यालय रामनगरका एसपी नरेशराज सुवेदीका अनुसार नुवाकोटको चिस्यान केन्द्रका लागि उक्त एमोनिया ग्यास लगिँदै थियो।

बाटोमा ग्यास लिक भएपछि सुरक्षाका लागि दुबै तर्फको राजमार्ग बन्द गरिएको एसपी सुवेदीले जानकारी दिनुभयो । अहिले कुनै क्षति नहोस् भनेर दमकलले ‘फोम’ प्रयोग गरेको छ। 

नजिक जादा पिरो गन्ध आएकाले स्थानीयलाई स्वासफेर्न समेत समस्या भएको घटनास्थलमा रहेका पत्रकार बासु श्रेष्ठले बताउनुभएको छ । गाडीमा रहेका १७ वटा ग्यास सिलिन्डर मध्ये एउटाबाट ग्यास लिक भएको हो ।