काठमाडौँ । चौतर्फि बिरोधपछि ड्युटीमा रहेका प्रहरीलाई कुटपिट गर्ने अनेरास्ववियुका नेता कमल जोशी पक्राउ परेका छन् । जोशीलाई बिहीबार साँझ बानेश्वरबाट नियन्त्रणमा लिइएको जिल्ला प्रहरी परिसर काठमाडौंका प्रवक्ता अपील राज बोहोराले जानकारी दिनुभएको छ ।

उक्त  घटनामा संलग्न रहेको आरोपमा यसअघि दुई जना पक्राउ परिसकेका छन् । 

जोशीसहितको समूहले माघ २४ गते राति ठमेलमा ड्युटीमा रहेका प्रहरीमाथि कुटपिट गर्दै सवारी साधनमा तोडफोड समेत गरेको थियो । उनीहरूको आक्रमणबाट प्रहरी दरबारमार्ग वृत्तका क्वीक रेस्पोन्स टिम (क्युआरटी)का प्रहरी हवल्दार जगुलाल चौधरी र जवान नर्गेन्द्रराज विष्ट घाइते हुनुभएको छ ।   

प्रहरीले यही प्रकणमा जोडिएका ताप्लेजुङका दिनश सिग्देल र डडेल्धुराका रमेश फुलारालाई माघ २७ गते पक्राउ गरेको थियो । तर, जोशीले उन्मुक्ति पाएका थिए । जोशी अनेरास्ववियुका स्थायी कमिटी सदस्य एवं अमृत साइन्स क्याम्पस (अस्कल) इकाइका पूर्वअध्यक्ष हुन् ।