चितवन ।  चितवनमा मारिएको हात्तीको न्यायका लागि काठमाडौँमा प्रदर्शन भएको छ । राष्ट्रिय निकुञ्जमा मारिएको जंगली हात्ती ‘मकुना’को हत्या विरोधमा बिहीबार काठमाडौँमा प्रदर्शन गरिएको हो । 

मारिएको  हात्तीको न्याय माग्दै पशु कल्याण संघ  नेपालले बबरमहलस्थित राष्ट्रिय निकुञ्ज तथा वन्यजन्तु संरक्षण विभाग परिसरमा प्रदर्शन गरेको हो ।

प्रदर्शनमा स्नेहा केयर, एनिमल नेपाल लगायका पशु कल्याणमा काम गर्ने संस्था र अन्य पशुअधिकारकर्मीहरूको सहभागिता थियो । प्रदर्शनकारीले मकुना हात्तीको हत्यारालाई कारबाही गर्न माग गरेका छन्।

चितवन राष्ट्रिय निकुञ्जमा जंगली हात्ती मकुनालाई जसरी मारियो त्यो एकदमै निन्दनीय काम भएको पशु कल्याण संघकी अध्यक्ष स्नेहा श्रेष्ठले बताउनुभयो ।  उहाँले मकुनालाई मार्ने व्यक्तिहरुलाई कारबाही हुनुपर्ने बताउनुभयो। 

हात्तीको मृत्युको विषयमा सरकारले छानबिन समिति पनि बनाएको छ ।  समितिको टोली ‘मकुना’ मारिएको ठाउँ स्थलगत अवलोकन गरी  काठमाडौँ फर्किसकेको छ ।