काठमाडौँ । गायिका एलिना चौहानले पति विष्णु सापकोटासँग औपचारिक रुपमा सम्बन्ध विच्छेद गर्नुभएको छ । मंगलबार गायिका चौहानले औपचारिक रुपमै पतिसँग सम्बन्धविच्छेद भएको सामाजिक सञ्जालमार्फत जानकारी दिनुभएको हो ।

उहाँले फेसबुकमा लेख्नुभएको छ, ‘आजदेखि स्वतन्त्र भएर कानुनी रुपमै आ आफ्नो गन्तव्य तय गर्न बाटो खुलेको छ।’ उहाँले पत्नीका रुपमा अधिकारले पाउने सम्पत्ति पनि विष्णुकै प्रगति र उन्नतिका लागि छोडेको बताउनुभएको छ । 

‘पत्नीका रुपमा अधिकारले मैले पाउने सम्पत्ति तिम्रै प्रगति र उन्नतिका लागि छोडेको छु।’ उहाँले लेख्नुभएको छ । विवाहदर्ता र शारीरिक मिलन मात्रै विवाह नहुने भन्‍दै उहाँले यसका लागि भावनात्मक मिलन, आपसी विश्वास र समझदारी हुनपर्ने बताउनुभएको छ । 

‘तर फेरा, चुरा, सिन्दुर, लगनगाँठो, विवाहदर्ता र शारीरिक मिलन मात्रै विवाह होइन रहेछ’, उहाँ लेख्नुहुन्छ, ‘भावनात्मक मिलन, आपसी विश्वास र समझदारी नै विवाहको मुख्य प्राण रहेछ । जुन रहेन, अनि हाम्रो सम्बन्धमा अल्पायुमै पूर्णविराम लागेको छ।’