काठमाडौँ । राष्ट्रिय स्वतन्त्र पार्टी (रास्वपा)की सांसद सुमना श्रेष्ठले संसद्‌मा दर्ता भएको सामाजिक सञ्जाल विधेयकको चौतर्फि विरोध भएको भन्दै त्यसतर्फ सरकारको ध्यानाकर्षण गराउनुभएको छ । 

आजको प्रतिनिधिसभा बैठकमा आकस्मिक समय लिएर बोल्दै सांसद श्रेष्ठले सरकारको ध्यानाकर्षण गराउनुभएको हो । 


‘हिजोबाट सामाजिक सञ्जालमा प्रोटेस्ट शुरु भएको छ । सरकारले दर्ता गरेको सामाजिक सञ्जाल विधेयकबारे आवाज शुरु भएको छ,’ बैठकमा उहाँले भन्नुभयो, ‘यो आवाजलाई सरकारले सुन्छ ? यो आवाज उठाउँदै गर्दा सरकारको ध्यानाकर्षण गराउँछु ।’

‘पेलेरै यो सदनबाट विधेयक पारित हुन्छ भन्ने हामीले देखेका पनि छौं । कन्टेन्ट क्रियसन भनेको के हो ? सोसल मिडियाका सामान्य कुराहरू पनि नबुझेर सरकारले यो विधेयक ल्याएको छ,’ उहाँले भन्नुभयो । सामाजिक सञ्जालमा युवाको मुख थुन्न खोजेको हो भने त्यसले दुर्घटना निम्त्याउने उहाँको तर्क छ ।