पर्सा । पथलैयास्थित राजस्व अनुसन्धान कार्यालयले चुहावट बढेको जनाएको छ । 

कार्यालयले चालु आर्थिक वर्षको ६ महिनामा ६८ करोड ७३ लाख रुपैया मागदाबीसहित राजस्व चुहावटसँग सम्बन्धित ८ वटा मुद्दा दर्ता गरेको छ । 

कार्यालयले गत आर्थिक वर्षको त्यही अवधिमा  ५४ लाख मागदाबीसहित राजस्व चुहावटसँग सम्बन्धित एउटा मुद्दा दर्ता गरेको थियो । कार्यालयका प्रमुख अनुसन्धान अधिकृत हरिप्रसाद शर्माले गत आवको ६ महिनाको तुलनामा चालु आवको त्यही अवधिमा राजस्व चुहावटसम्बन्धी मागदाबी रकम र मुद्दा सङ्ख्या उल्लेखनीय रुपमा वृद्धि भएको बताउनुभयो । 

कार्यालयले चालु आवको ६ महिनामा चुहावट धरौटी रकम  दुई करोड ९८ लाख रुपैयाँ सङ्कलन गरेको छ । गत आवको त्यहीे अवधिमा  एक करोड ५२ लाख रुपैयाँ धरौटी राज्य कोषमा दाखिला भएको थियो । 

साथै गत आवको ६ महिनाको तुलनामा चालु आवको त्यही अवधिमा भिसिटीएस जरिवाना रकम पनि १२ लाख ४३ हजार रुपैयाँ बढी सङ्कलन भएको छ ।