काठमाडौँ । संसद अधिवेशन शुरु भएपछि सांसदहरु सरकारले यसबीचमा ल्याएका अध्यादेशको पक्ष  र विपक्षमा लागेका छन् । प्रतिपक्ष सांसदहरुले अध्यादेशको चर्को विरोध गरिरहेका छन् भने सत्ता पक्षका सांसदहरु सरकारको निर्णयको बचाउमा लागेका छन् । 

प्रतिनिधिसभादेखि राष्ट्रियसभासम्मका सांसदहरुमा सम्म यही प्रवृति देखिएको छ । तर राष्ट्रियसभाका एक सांसदले भने  अध्यादेशको न बचाउ गर्नुभएको छ, नत विरोध नै । उहाँहरु हुन्छ पूर्वउपप्रधानमन्त्री तथा राष्ट्रियसभा सदस्य वामदेव गौतम । नेकपाकालमा एमाले पक्षबाट राष्ट्रियसभा सदस्यमा मनोनित हुनुभएका पूर्वउपप्रधानमन्त्री पछिल्लो समय पार्टीको हिसाबले यता न उताको बन्नुभएको छ । एमालेमै फर्कने इच्छा भए पनि नेतृत्वले अल्मल्याएपछि उहाँ यता न उताको बन्नुभएको हो । 

अहिले अध्यादेशको सवालमा पनि पूर्वउपप्रधानमन्त्री गौतमले यता न उताको अवस्था हुनुहुन्छ । आइतबार राष्ट्रियसभा बैठकमा सम्बोधन गर्ने क्रममा  पूर्वउपप्रधानमन्त्री गौतमले राजनीतिक माहोल अहिले अध्यादेशले तातेको तर त्यसको राप आफू. नपरेको आशयको धारणा व्यक्त गर्नुभएको छ । अध्यादेश मुख्यतः राज्य सञ्चालन सत्ताधारी शक्तिलाई सकारात्मक सहयोग पुग्नेगरी निर्माण गरिएको संवैधानिक संरचना भएको  पूर्वउपप्रधानमन्त्री गौतमको भनाई छ । 

‘अहिले केही समयदेखि अध्यादेश राजनीतिक माहोल बनेको छ । म अध्यादेश पक्षधर पनि होइन, विपक्षमा पनि लागेको छैन । यसको सैद्धान्तिक थाहा छ’ उहाँले भन्नुभयो ‘अध्यादेश मुख्यतः राज्य सञ्चालन सत्ताधारी शक्तिलाई सकारात्मक सहयोग पुग्नेगरी निर्माण गरिएको संवैधानिक संरचना हो । तर प्रजातान्त्रिक परिपाटी उल्लंघन नहोस् भनेर अध्यादेश जारी गर्न धेरै शर्त पूरा गर्नुपर्छ ।’

कमयुनिष्टहरुले पछिल्लो समय मुलुकलाई समाजवादतर्फ लैजानुपर्ने तर्क गर्दै आएका छन् । पूर्वउपप्रधानमन्त्री गौतमले देशमा समाजवाद निर्माण गर्न सकिने दाबी समेत गर्नुभएको छ । ‘समाजवाद निर्माण गर्न सकिन्छ । समाजवादको संरचना निर्माण गर्न सकिन्छ । म आफूलाई दाउमा राख्न चाहन्छु’ उहाँले भन्नुभयो  ‘मलाई मृत्युदण्ड दिइयोस् यदी समाजवाद निर्माण हुन सक्दैन भने । वर्ष तोकियोस् । यति वर्ष भित्रमा समाजवाद निर्माण गर्न सकिएन भने म मृत्युदण्डमा जान तयार छु ।’