तनहुँ ।  व्यास नगरपालिका–८ पुलिमराङस्थित शहीद स्मारक कोष समितिले सहिदपार्कको विकासका लागि सहयोग गर्न राष्ट्रपति रामचन्द्र पौडेलसमक्ष आग्रह गरेको छ । 

शहीद दिवसको अवसरमा आज पुलिमराङ आइपुग्नुभएका राष्ट्रपति लाई ज्ञापनपत्र बुझाउँदै समितिले यस क्षेत्रको समग्र विकासका लागि सरकारको ध्यानाकर्षण गराइदिन आग्रह गरेको हो ।

बृहत् गुरुयोजनाअनुसार शहीद पार्कको सर्वाङ्गीण विकासका लागि  १५ करोड रुपैयाँ बजेट आवश्यक पर्ने देखिएकाले बजेट विनियोजनका लागि पहल गरिदिनुहुन राष्ट्रपतिसमक्ष आग्रह गरिएको समितिका अध्यक्ष एकबहादुर गुरुङले जानकारी दिनुभयो ।

शहीद स्मारक पार्क तथा पुलिमराङको वर्तमान अवस्थाका बारेमा राष्ट्रपति जानकार रहनुभएको उल्लेख गर्दै अध्यक्ष गुरुङले यस क्षेत्रको विकास निर्माणअन्तर्गत पक्की सडक, बिजुलीको स्तरीय व्यवस्थापन, पर्यटकीय सम्भावना, कृषि एवं आयआर्जनका विषयमा स्थानीयलाई देखिने गरी विकास निर्माणका लागि सरकारसँग सहयोग उपलब्ध गराउने सन्दर्भमा राष्ट्रपति पौडेलको ध्यानाकर्षण गर्नुभयो । 
 
शहीद  दिवसका अवसरमा सहिदहरुप्रति श्रद्धाञ्जली अपर्ण गर्न आजै पुलमराङस्थित सहिद पार्क आइपुग्नुभएका राष्ट्रपतिलाई जिल्लास्थित कार्यालय तथा सुरक्षा निकायका प्रमुख, राजनीतिक दलका नेता तथा कार्यकर्ता र स्थानीय जनताले स्वागत गर्नुभएको थियो ।

त्यस अवसरमा राष्ट्रपति पौडेलले पुलिमराङस्थित सहिदपार्कमा रहेका शहीद हरुको शालिकमा माल्यार्पण गर्नुभएको प्रमुख जिल्ला अधिकारी श्यामकृष्ण थापाले जानकारी दिनुभयो ।

तनहुँको सदरमुकाम दमौलीबाट उत्तरतर्फ करिब ४० किलोमिटर टाढा पुलिमराङस्थित सहिदपार्कमा भरत गुरुङ, शमशेरबहादुर गुरुङ, लालध्वज गुरुङ, धर्मध्वज गुरुङ, सर्वसिंह गुरुङ र हस्तवीर गुरुङको लहरै अर्धकदको प्रतिमा छन् । जहाँनिया राणाशासन र निर्दलीय पञ्चायती व्यवस्थाविरुद्धको आन्दोलनमा ज्यान गुमाएका उल्लिखित शहीदहरूको जन्म पुलिमराङमा भएको हो ।

यसै सन्दर्भमा शहीद  स्मारक कोष समिति २०५१ सालमा स्थापना भएको र २०६६ सालमा छ जना सहिदको अर्धकदको सालिक राखिएको समितिले जनाएको छ ।  

राष्ट्रपति पौडेल शहीद दिवससँग सम्बन्धित कार्यक्रम सम्पन्न भएपछि लमजुङको मध्यनेपाल नगरपालिका सोतीपसलस्थित मङ्गला माध्यमिक विद्यालयको हीरक जयन्ती समारोहमा सरिक  हुने कार्यक्रम छ ।