जनकपुर ।  मधेस प्रदेशका भौतिक पूर्वाधार मन्त्रालयका ‘ड्राइभर’को मोटरसाइकल दुर्घटनामा मृत्यु भएको छ । भौतिक पूर्वाधार मन्त्रालय मधेस प्रदेशका चालक देवेन्द्र यादवको मोटरसाइकल दुर्घटनामा मृत्यु भएको हो । 

चालक यादवको जनकपुरधामस्थित मधेस भवन अगाडि आज मोटरसाइकल दुर्घटना हुँदा जीवन गुमेको  जिल्ला प्रहरी  प्रवक्ता बरुणबहादुर सिंहले जानकारी दिनुभएको छ । प्रहरी प्रवक्ता सिंहका अनुसार यादव कार्यालय जाँदै गर्दा मोटरसाइकल दुर्घटना भएको हो । दुर्घटनामा यादवको टाउकोमा गम्भीर चोट लागेको थियो। घाइते यादवलाई प्रादेशिक अस्पताल पुर्याएपछि चिकित्सकले मृत घोषणा गरेका हुन् । 

यादव सवार ज १ ब ७५५ नम्बरको मोटरसाइकललाई विपरीत दिशाबाट आइरहेको मधेस प्रदेशको २–०२–००४ प ८१९६ नम्बरको मोटरसाइकलले ठक्कर दिएको थियो । ठक्कर दिने मोटरसाइकल चालकसहित दुई जनालाई प्रहरीले पक्राउ गरेको छ ।